Buǵan deıin de oblys ákimi qalanyń shetki aımaqtaryn birneshe ret aralap, qala basshylyǵyna barlyq qurylys jumystarynyń tıisti talaptarǵa saı bolýyn qadaǵalaýdy tapsyrǵan bolatyn. Bul joly aralaý Yntymaq aýylynan bastaldy.
Yntymaqta 400 gektardan astam jerde 2232 ýchaske bar desek, búgingi kúnge sonyń 521 ýchaskesinde úı salynǵan. Munda eki avtobýs baǵyty belgilenip, olar aýyldyń ortasynan júrip ótedi. Degenmen, aýqymdy aýyl úshin bul baǵyttyń jetkiliksiz ekenin aıtqan oblys ákimi avtobýs marshrýttaryn turǵyndarǵa yńǵaılap qaıta qarastyrýdy, sondaı-aq qoǵamdyq kólik júretin negizgi kósheni asfalttaýdy tapsyrdy.
Mundaǵy ınjenerlik-ınfraqurylym júrgizý qurylysyn «Stroıservıs-97» JShS merdiger mekemesi atqarýda. Olar tartqan elektr kabelderi men baǵanalardyń ornatylýy oblys basshysynyń kóńilinen shyqqan joq, zaman talabyna saı jasalmaǵan. Álsiz tok júrgizý qajettigi, atap aıtqanda telefon jelisin, ınternet jelisin tartý suranysy zerdelenbegen. Ákim ózine usynylǵan Yntymaq 1, 2 ,3 aýyldarynyń damý josparyndaǵy áleýmettik nysandardyń jobalary jaıly surady. Mektep jobada bar, balabaqsha belgilenbegen. Berilgen jaýapqa kóńili tolmaǵan A. Batalov: «Bul máselelerdi osyǵan deıin de birneshe ret tapsyrǵanmyn. Áli eshqandaı nátıje joq. Eń aldymen osy aýylda qansha bala bar, olarǵa qansha oryndyq mektep, qansha orynǵa balabaqsha kerek dep eseptep, oılaýlaryń kerek qoı. Senderge eki apta ýaqyt beremin, osy aýyldardyń ınjenerlik-ınfraqurylymy - sýy, jaryǵy, joly, jaryqtandyrylýy, sol sııaqty mektep, balabaqsha sııaqty áleýmettik nysandary boıynsha jan-jaqty tolyqtyrylǵan jobalaryńdy ákelip kórsetetin bolasyńdar», - dedi.
Munan soń Jastar – 2 turǵyn aýdanynyń jaıymen tanysý kezegi keldi. Munda sý qubyrlaryn tartý jumysy ótken jyly aıaqtalǵan. Endi elektr jelilerin tartýǵa kirispek. Bul aýylǵa № 227 jáne № 27 avtobýstar baǵyttalǵan. Oblys ákimi A. Batalov aýyldyń avtobýs júretin negizgi kóshesin asfalttaýmen qatar, jaıaý júrginshi jolyn, aryq júıelerin qosa qarastyrýdy eskertti. Negizgi kósheden basqa 13 kóshege de qıyrshyq tas tóselmek. Qala ákimi D. Shaltabaev Jastar – 3 atalatyn aýmaqtyń jer ýchaskeleri ázirge taratylmaǵanyn aıtty. Osy oraıda oblys basshysy A. Batalov: «Jastar – 3 turǵyn aýdanyn úlgili aýyl retinde jasaımyz, eń aldymen barlyq qajetti ınfraqurylymyn jobaǵa sáıkes tolyq júrgizip baryp, turǵyn úı salýǵa ýchaskelerdi bóletin bolamyz», - dedi ol.
Kelesi kezekte atqarýshy organ ókilderi Qyzyltas saıajaıynyń aýmaǵyna keldi. Bul aýmaqta da problemalar jeterlik. Eń basty másele – saıajaıdy qalamen jalǵastyratyn jalǵyz kópirdiń jaıy. Bul máseleden habardar oblys ákimi qala ákimdigine bıyl jazdan qaldyrmaı kópirdiń qurylysyn bastaýdy tapsyrdy. Qyzyltaspen qatar Shaıqorǵannyń da turǵyndary kóktem kezinde qyzyl sýdan qıyndyq kóretinderin de aıtty. Oblys ákimi osyǵan baılanysty tıisti mekemeler basshylaryna tótenshe jaǵdaılar júıesi boıynsha munda damba salýdy, biraq dambany sý shaıyp ketetindeı emes, berik te sapaly etip jasaýdy eskertti. Saıajaı turǵyndary koǵamdyq kóliktiń baǵytyn uzartý, jyly aıaldama qoıý, qylmystyń, sonyń ishinde urlyqtyń jıi oryn alýy, urlyq-qarlyqty boldyrmaý úshin beınebaqylaý kameralaryn ornatý sııaqty birqatar usynystaryn jetkizdi. Osy máselelerge qatysty qalalyq polısııa qyzmetine, qalalyq ákimdikke tıisti tapsyrmalar berildi. «Polısııa bólimshelerine barlyq jaǵdaıdy jasadyq, materıaldyq-tehnıkalyq bazasyn nyǵaıttyq, biraq jumystaryńda nátıje joq. Qylmystyń ashylýy boıynsha eń tómengi kórsetkishtemiz. Esterińde bolsyn, polısııanyń reaksııasy qalanyń ortasynda bolǵan urlyq pen saıajaıda bolǵan urlyqtyń ekeýine de birdeı bolýy kerek», - dedi oblys basshysy polısııa qyzmeti basshylaryna qarata.
Osy rette Úıtas saıajaıynyń turǵyndary da aýyz sýdan taryǵyp otyrǵandaryn aıtyp shaǵymdandy. «Bul máselege respýblıkalyq bıýdjetten qarjy bólinedi. Biraq biz ony kútip qarap otyrmaı, oblystaǵy rezervtik qordan 200 mln. teńge bólip, qurylys jumystaryn bastaı beremiz», - dedi A. Batalov. Sol sııaqty Úıtas saıajaıynda bes jyl buryn salynǵan, qazir jumys istep turǵan meshittiń qujattarynyń áli kúnge rásimdelmeý qıyndyqtaryna qatysty da másele kóterildi. Oblys ákimi bul problemany sheshýge qalalyq ákimdikke úsh kún ýaqyt berdi.
Kóktal shaǵyn aýdany – qalanyń halyq jıi qonystanǵan aýdandarynyń biri. Bul jerde de negizgi asfalt jolǵa ortasha jóndeý júrgizý, elektr jelilerin tartý jumystary aıaqtalmaǵan eki kóshedegi jumystary bitirý, jyly aıaldamalar qoıý, túngi jaryqtandyrý máseleleri aıtyldy. Sol sııaqty oblys basshysyna jobalyq quny 116 mln. teńge bolatyn ortalyq saıabaqtyń jobasy tanystyryldy. Qarjynyń bólinýine qaraı aýyl ishin gazdandyrýǵa kirisý kerektigi de aıtylyp, aýyldyq dárigerlik ambýlatorııa salý, mádenıet úıin qaıta jańǵyrtýǵa qatysty usynystar qoldaý tapty.
Aralaý sońynda kórgen-túıgen nárseleri men bergen tapsyrmalaryn qorytyndylaǵan oblys ákimi A. Batalov:
- Qalanyń shetki aýmaqtaryn eń aldymen sýmen, elektr jaryǵymen qamtýǵa, negizgi kóshelerin asfalttaýǵa nazar aýdarý kerek. Olarǵa júretin qoǵamdyq kóliktiń júrý baǵyttaryn turǵyndardyń talaptaryn eskere otyryp, qaıta qarańdar. Jyly aıaldamalar qoıyp, sol jerge beınebaqylaý kameralaryn ornatyńdar. Ony eshkim buzyp-shaǵyp ketpeýi úshin baqylap otyrýǵa kameralar mindetti túrde kerek. Shetki aýyldardaǵy áleýmettik nysandar boıynsha naqty jobalaryńdy ákelip kórsetesińder. Atqarylǵan jumys boıynsha maǵan emes, halyqtyń aldynda esep beretin bolasyńdar, - dedi A. Batalov.
