Memleket basshysy «Qazmunaıgaz» jáne «Lýkoıl» kompanııalary arasyndaǵy seriktestik qarym-qatynastardyń tıimdiligin jáne onyń jaqsy damyp kele jatqanyn atap ótti.
– Biz «Lýkoıl» kompanııasymen burynnan birge jumys istep kelemiz. Kompanııalaryńyz – Reseıdegi iri kásiporyndardyń biri. Sondaı-aq, sizder Reseıdiń Qazaqstandaǵy mańyzdy ınvestorlarynyń biri sanalasyzdar. «Lýkoıl» bizdiń ekonomıkamyzǵa 9 mıllıard AQSh dollaryna jýyq ınvestısııa bóldi, – dedi Nursultan Nazarbaev.
Qazaqstan Prezıdenti Reseı kompanııasymen ınvestısııalyq yntymaqtastyqty odan ári nyǵaıtýǵa nıettestik bildirdi.
Áńgimelesý barysynda Memleket basshysyna Kaspıı teńiziniń Qazaqstanǵa tıesili bóligindegi kómirsýtegi shıkizatyn barlaý jáne óndirý jónindegi «Jeńis» jobasyn birlese iske asyrýǵa qatysty jospar týraly egjeı-tegjeıli baıandaldy.
«Lýkoıl» munaı kompanııasynyń prezıdenti Qazaqstan aýmaǵyndaǵy jaǵarmaı materıaldaryn shyǵaratyn zaýyttyń qurylys jumystarynyń nátıjeleri jóninde Nursultan Nazarbaevqa málimet berdi.
– Kásiporynnyń josparlanǵan qýaty jylyna 100 myń tonna bolady. Zamanaýı zaýyt jaǵarmaı materıaldarynyń barlyq túrin, atap aıtqanda, 700 ónimdi túrli ataýlarmen shyǵaratyn bolady, – dedi V.Alekperov.
Kezdesý barysynda ozyq tehnologııalardy qoldana otyryp, jańa kómirsýtegilerdiń ken oryndaryn izdeý úshin birlesken jumystar júrgizý, sondaı-aq Qazaqstan Respýblıkasy Energetıka mınıstrligi ázirlep jatqan 2021-2025 jyldarǵa arnalǵan geologııalyq barlaý baǵdarlamasyn júzege asyrý isine Reseı kompanııalarynyń atsalysý máselesi talqylandy.
