Mınıstr E.Turǵymbaev polısııa qyzmetkerleriniń quqyqtyq-áleýmettik jaǵdaıyn jaqsartý máselesi Elbasy men Úkimet qoldaýynyń arqasynda sheshilip jatqanyn jetkizdi. Alaıda, jańa formattaǵy polısııany qurý birqatar máselelerdi sheshýdi qajet etedi. «Eń aldymen, polısııa qyzmetkerleriniń jalaqysy tómen. Mysaly, polısııa serjantynyń ortasha jalaqysy búginde 87 myń teńge, al leıtenanttan maıorǵa deıingiler 110 myńnan 147 myń teńgege deıin aılyq alady», dedi ol. Onyń sózine sensek, bul soma ózge organdardaǵy dál osyndaı shendi qyzmetkerlerdiń jalaqysynan 10-50 paıyzǵa tómen.
Mınıstr kadrlyq jaǵdaıǵa da toqtaldy, mamandardyń turaqsyzdyǵy jumys sapasynyń artýyna kedergi keltirýde. «Byltyr 8800-den astam maman qyzmetten ketti. Sonyń 42 paıyzy óz erkimen shyqqan. Búginde 11200 polısııa qyzmetkeri jetkiliksiz. Bul 14 paıyzdy quraıdy. Ishki ister mınıstrliginde jumys osy sebepti tolyqqandy atqarylmaı otyr», dedi E.Turǵymbaev.
Memleket basshysy ótken jyly: «Polısııa men turǵyndardyń arasyndaǵy baılanys eskirdi. О́kinishke qaraı, bizdiń elde reforma jasaýda kenjelep qalǵan osy ishki ister organy bolyp otyr», deı kele, jedel túrde reforma júrgizýdi jáne shtattyq birlikti qysqartyp, únemdelgen qarjy esebinen polısııa qyzmetkerleriniń jalaqysyn kóterýdi tapsyrǵan edi. Osyǵan oraı, mınıstr E.Turǵymbaev otyrystaǵy baıandamasynda: «Qazirgi tańda mınıstrlik Úkimet bekitken Ishki ister organdaryn jańǵyrtý jóninde jol kartasyn iske asyrýda. Onyń sheńberinde ishki ister organdarynyń shtat sany 10 paıyzǵa, ıaǵnı 10 myń 860 birlikke, osynyń ishinde basshy quramynyń sany 1 myńǵa qysqartyldy», dedi. Mınıstrdiń málimetinshe, osy qysqartýdan únemdelgen 16 mlrd teńge qyzmetkerlerdiń jalaqysyn ósirýge jumsalady.
Budan bólek, komıssııa tóraǵasy Q.Sultanov Ishki ister mınıstrligindegi reformaǵa taldaý jasaý úshin Birikken Ulttar Uıymynan arnaıy sarapshy keletinin aıtty. «Bul maman quqyq qorǵaý, sot organdaryndaǵy adam quqyǵynyń saqtalýyna saraptaıtyn bolady. Ol bizdiń reformamyzdy zerdelep, odan keıin sonyń negizinde saraptama jasaıdy», dedi ol. Aıta keteıik, BUU sarapshysy elimizge mamyr-maýsym aılarynda kelmek.
Aıdana ShOTBAIQYZY,
«Egemen Qazaqstan»
