Eger óńirde aılyq ortasha jalaqylary 42 myń teńgeden kem qyzmetshilerdiń eńbekaqylaryn shuǵyl kóterý jóninde naqty is-qımyl jospary júzege asqan bolsa, buǵan «Nur Otan» partııasynan saılanǵan máslıhat depýtattarynyń qosqan úlesteri mol. Sondaı-aq aımaqtaǵy barlyq kásiporynda eńbekaqy mólsheri 15-20 paıyz mólsherinde ósti. Áleýmettik máni men mańyzy joǵary istiń júıeli júrgizilýi úshin tıisti partııalyq baqylaý mehanızmi engizilip, áriptesterimiz ortaq istiń nátıjeli bolýyna atsalysty. Osyndaı túıindi básekelestikti damytý men turǵyn úı-kommýnaldyq sharýashylyǵy salasynda atqarylǵan qyzmetterge qatysty aıtýǵa da bolady. Osy oraıda jumys tobynyń quramynda bolǵan nurotandyq depýtattar óńirde kommýnaldyq qyzmet tarıfteriniń 5-10,5 paıyz mólsherinde tómendeýine bastamashy bola bildi.
Memleket basshysy óz Joldaýynda atap kórsetkendeı, áriptesterimiz bıznesti zańsyz qysymdar men qylmystyq qýdalaý kórinisterinen qorǵaý isinde de tabandylyq pen batyl betburystar jasap keledi. Muny «Nur Otan» partııasy atynan saılanǵan máslıhat depýtattary «Atameken» ulttyq kásipkerler palatasynyń Aqtóbe oblystyq fılıalymen birlese atqaryp júr.
Aqtóbe aımaǵynda jer asty qazba baılyqtaryn ıgerip jatqan sheteldik kompanııalar jetkilikti. Respýblıka Prezıdenti Qazaqstan halqyna Joldaýynda jer qoınaýyn paıdalanýshylar qazaqstandyq úlestiń kólemin kóterý máselesin udaıy nazarynda ustaýy kerektigin tapsyrǵany belgili. Bul kómirsýtegi shıkizaty men ózge de ken oryndarynda otandyq óndirisshilerdiń taýarlaryn paıdalanýǵa basymdyq berý degen sóz.
Jasyratyny joq, buǵan deıingi partııalyq baqylaýlar barysy bul istiń jaı-kúıi, ıaǵnı otandyq taýarlarǵa degen suranys ony paıdalanýshylar tarapynan oıdaǵydaı bola bermeıtinin kórsetken edi. Ras, sheteldik kompanııa ókilderiniń de aıtar ýájderi men talaptary, usynystary men tilekteri joq emes. Osyndaı kezde qazaqstandyq úlesti kóterý jóninde sheteldiktermen birge ótkizilgen jıyndarda nurotandyqtar bildirgen oryndy oı-pikirlerge zeıin qoıa bilgen jer qoınaýyn paıdalanýshylar da bar. Sonyń nátıjesinde óńirde qazaqstandyq úlesti kóterý isinde oń mysaldar kóbirek oryn ala bastady.
Qazirgi kezde «Nur Otan» partııasy mektep ashanalarynyń qyzmetin reformalaý jónindegi baǵdarlamany iske asyrýda. Partııa Tóraǵasynyń birinshi orynbasary Máýlen Áshimbaev ótken jyly oblysqa kelgen saparynda «Mekteptegi tamaqtaný kombınaty» dep atalǵan baǵdarlamaǵa oń baǵa berip ketken edi. Mundaǵy maqsat – mektep ashanalaryn bıznestik býyndarǵa bere otyryp, oqýshylardy sapaly da nárli ári qunarly azyq-túlik ónimderimen qamtý, onyń qaýipsizdigin qamtamasyz etý bolyp otyr. Búginde Aqtóbe aımaǵynan bastalǵan osyndaı oń tájirıbeler búkil respýblıka aýmaǵyna da sińisti bola bastaǵany – bárimiz úshin mereı. Áleýmettik salmaǵy joǵary baǵdarlamanyń ata-analar men bilim berý salasy ókilderi tarapynan qoldaý tabýy da – nurotandyqtar bastaǵan istiń ómirsheńdigin kórsetedi.
Túıip aıtqanda, «Nur Otan» ózi qurylǵan kúnnen bastap halyqtyń muń-muqtajy men talap-tilekterine ortaqtasyp keledi. Onyń Aqtóbe aımaǵyndaǵy keıbir mysaldary osyndaı. Al Prezıdent Joldaýynda qoıylǵan talaptar men mindetterdi iske asyrýǵa óz úlesterin qosý nurotandyqtardyń basty paryzy, tól mindeti bolyp qala bermek.
Aınur BAQTYǴALIEVA,
Aqtóbe oblystyq máslıhatynyń depýtaty
AQTО́BE
