Biraq bir adamnyń jasaǵan izgi isinen qulaǵdar bolǵan ekinshi adamnyń boıynda da qaıyrym etýge degen ynta oıanatyny aqıqat. Osy rette, ásirese qolynda artyq qarajaty bar kásipkerlerdiń muqtaj jandarǵa jasaǵan ıgi amaldaryn aıtýymyzdyń jóni bar. Osyndaı ıgi is Jetisý topyraǵynda jalǵasyp jatyr. Jaqynda óńirge tanymal mesenat-kásipker Asqar Súleımenov Talǵar aýdany Gúldala aýylynan muqtaj otbasyǵa baspana satyp alyp berdi. Janbolatovtar áýleti buǵan deıin aýyldaǵy monsha úshin salynǵan ǵımaratty panalap kelgen eken.
– Qýanysh Janbolatovtyń otbasy eski monshada turatynyn ári otaǵasynyń múgedek ekenin áleýmettik jeliden kórip, habardar boldyq. Beınejazbany kórgen oblys ákimi Amandyq Batalov Talǵar aýdanyndaǵy isker azamattardan qolushyn berýdi ótindi. Alǵashqy bolyp ún qatqan mesenat Asqar Súleımenov otbasyna úı satyp alyp beretinin aıtty, − deıdi bizdi oqıǵa barysynan habardar etken oblys ákiminiń baspasóz hatshysy Ǵalymurat Júkel.
Al otaǵasy Qýanysh Janbolatov bılik tarapynan mundaı áreket kútpegen eken. Ol baspanaly bolǵanyn oblys ákiminiń ózi kelip, jańa úıge kóshetinin aıtqanda baryp bir-aq bilgen. Uıǵyr aýdanynyń týmasy óndiristik jaraqattyń kesirinen bir kózinen aıyrylypty. Qazir jumyssyz. Muqtaj otbasyn jarylqaǵan mesenat Asqar Súleımenov Qýanyshqa aýyldan laıyqty jumys taýyp berýge ýáde berdi. Demek, bul ıgi is aıtýǵa turarlyq jaıt.
Sondaı-aq Alakól aýdanynda da baspanaǵa muqtaj otbasylardyń ótinishi qanaǵattandyryldy. Jaqynda aýdan ákimi Álibek Jaqanbaevtyń tapsyrmasymen Beskól aýyldyq okrýginde eki áýletke turǵyn úı qorynan páter berildi. Beskóldik jalǵyzbasty áke Nıkolaı Odýdenko 3 balasyn baǵyp-qaǵyp otyr. Jaǵajaıdaǵy qonaq úılerdiń birinde qara jumys isteıtin Nıkolaı áýletimen eski úıdi panalap kelgen edi. Baspana degen aty bolmasa, bul úıde balalardyń sabaqqa daıyndalýyna, alańsyz oınaýyna esh múmkindik joq-tuǵyn. Balalarynyń úsheýi de sabaqty jaqsy oqıdy. Vıktorııa altynshy, Vladımır tórtinshi, al Sergeı ekinshi synypqa baryp júr. Jalǵyzbasty ákeniń jaıynan habardar bolǵan aýdan ákimi Nıkolaıǵa Beskól aýylynan 2 bólmeli páter berdi. Qazir ortalyqtan jylıtyn úıge qonystanǵan áýlettiń qýanyshynda shek joq.
Osy Beskól aýyldyq okrýginiń «Zagatzerno» aýylynda turatyn kóp balaly taǵy bir otbasynyń da jaǵdaıy máz emes edi. Aleksandra Melnıkovanyń 10 balasy bar. О́zi jalǵyzbasty ana. Beskóldegi balyq zaýytynda jumys isteıdi eken. Bar tapqan-taıanǵanyn balalarynyń aýzyna tosatyn Aleksandranyń basynda baspanasy joq. Aýdan ákimdigine jazǵan ótinishi qaralyp, jaqynda bul áýletke de 2 bólmeli páter berildi.
– О́ńirde kóp balaly otbasylarǵa kórsetiletin kómektiń kólemi jyl saıyn artyp keledi. Olardy azyq-túlikpen, kıim-keshekpen, turmystyq zattarmen, qystyq kómirmen qamtamasyz etý, basqa da materıaldyq qoldaý kórsetý boıynsha túrli sharalar bar. Baspana jaıyn da qoldan kelgenshe sheship jatyrmyz. Byltyr aýdan ortalyǵy Úsharal qalasynda salynǵan 20 jáne 60 páterli turǵyn úıden áleýmettik jaǵynan az qamtylǵan birneshe otbasyǵa páter berdik, − deıdi Alakól aýdanynyń ákimi Álibek Jaqanbaev.
Jalpy, Almaty oblysynda 2 myńnan astam kóp balaly ana turǵyn úı kezeginde tur eken. О́tken jyldyń jeltoqsan aıynda aımaq basshysynyń qabyldaýyna jazylǵan bir top kóp balaly ana Taldyqorǵan qalasyndaǵy turǵyn úı kezegine qatysty másele kótergen bolatyn. Sol kezde oblys ákimi A.Batalov «Altyn alqa», «Kúmis alqa» ıegerlerine úı kezegine qatysty týǵan problemany baqylaýyna alyp, ońtaıly sheshýge ýáde bergen edi. Munan bólek, Almaty oblysynda áleýmettik jaǵynan az qamtylǵan otbasylarǵa degen qamqorlyq nıet erekshe deýge bolady. Ásirese kóp balaly otbasylardyń ómir súrý deńgeıin arttyrýǵa basa mán berilýde.
– Oblys ákimdigi kóp balaly analarǵa kómek retinde «7-20-25» baǵdarlamasy boıynsha qaıtarymsyz 1 mıllıon nesıe berip, Taldyqorǵan qalasyndaǵy jańa kottedj qalashyǵynan jáne salynyp jatqan kóp qabatty eki turǵyn úıden páter satyp alýlaryna jaǵdaı jasamaq. Bıyl oblys ákiminiń oqý grantyn taǵy da 100 grantqa kóbeıtemiz. Munyń jartysy kóp balaly jáne az qamtylǵan otbasylardan shyqqan balalarǵa beriledi. Al az qamtylǵan otbasylardyń turǵyn úılerin gazǵa qosý baǵasyn ınvestorlar esebinen tómendetýge kiristik. Biz jeke turǵyn úılerge tegin gaz ólsheý qondyrǵysyn ornatý úshin de qarjy qarastyryp jatyrmyz, − deıdi oblys ákimi Amandyq Batalov.
Qalmahanbet MUQAMETQALI,
«Egemen Qazaqstan»
Almaty oblysy
