Otyrysty asha otyryp, Astana ákimi densaýlyq saqtaýdy damytýǵa baǵyttalǵan «Densaýlyq» memlekettik baǵdarlamasyn júzege asyrýdyń úshinshi jyly aıaqtalǵanyn eske saldy. «Biz astanalyqtardyń ómir súrý uzaqtyǵyn 76,2 jasqa deıin arttyrdyq. Bul el boıynsha ortasha kórsetkishten 3,2 jylǵa joǵary. Bul kórsetkishke biz bala týý kórsetkishiniń artýy men jalpy ólim-jitimniń tómendeýi arqasynda qol jetkizdik» dep atap ótti B. Sultanov. Ol elordanyń densaýlyq saqtaý qyzmetiniń Memleket basshysy qoıǵan mindetterge sáıkes, ólim men múgedektiktiń, sondaı-aq ana men bala óliminiń, qan aınalymy júıesi aýrýlarynyń, onkologııalyq aýrýlardyń, týberkýlez men jaraqattanýdyń negizgi sebepteriniń aldyn alýǵa baǵyttalǵandyǵyn aıtty.
Ákim sondaı-aq, jetistiktermen qatar, densaýlyq saqtaý salasynyń birqatar júıeli máselesi bar ekenine nazar aýdardy. О́z kezeginde, qalalyq qoǵamdyq densaýlyq saqtaý basqarmasynyń basshysy Qamaljan Nadyrov «Densaýlyq» memlekettik baǵdarlamasynyń júzege asyrylý barysy týraly aıtyp, ótken jylǵy vedomstvonyń jumysyn qorytyndylady, sondaı-aq 2019 jylǵa arnalǵan mindetterdi belgiledi. «О́tken jyly qalalyq aýrýhanalarda 200 myńnan astam adam emdeldi, 57 myńǵa jýyq ota jasaldy, elordada 28 myńnan astam bala dúnıege keldi, 600 myńnan astam shaqyrymǵa jedel járdem kórsetildi, qala emhanalaryna turǵyndar 4,5 mln ret qaralǵan. Júz myńnan astam naýqas tegin dári-dármekpen qamtamasyz etildi» dedi Q. Nadyrov.
Ol halyqpen keri baılanysty ornatý úshin biryńǵaı baılanys ortalyǵy – 109 jumys isteıdigin, astanalyq medısınaǵa qatysty barlyq máselelerdi qabyldaıtynyn eske saldy. «Emhanalardy damytý tujyrymdamasy ázirlendi, onda halyqqa ambýlatorııalyq kómekti jaqyndatý qarastyrylǵan, ıaǵnı otbasylyq dárigerlik ambýlatorııalardyń 20 mınýttyq qadamdyq qoljetimdiligine qol jetkiziledi», – dep jalǵastyrdy vedomstvo basshysy. Qamaljan Nadyrov sondaı-aq, basqarmanyń aǵymdaǵy jylǵa arnalǵan josparlary týraly aıtyp berdi: kórsetiletin medısınalyq qyzmetterdiń sapasy men qoljetimdiligin arttyrýǵa basa nazar aýdara otyryp, halyqtyń densaýlyǵyn odan ári jaqsartý boıynsha jumystar jalǵastyrylatyn bolady.
