Onyń sózine qaraǵanda, aldymen kópbalaly otbasynyń tabysy esepteledi. Al jańa járdemaqy tabysy tómen otbasylarǵa ǵana tólenedi.
«Bul - áleýmettik jaǵynan az qamtylǵan otbasylarǵa arnalǵan kómek. Jaǵdaıy jaqsy otbasylar ondaı kómekke zárý emes dep oılaımyn. Al kedeıshilik deńgeıinen tómen otbasylarǵa kómektesý kerek. Prezıdent aıtqandaı, kedeıshiliktiń deńgeıi kúnkóris mınımýmynyń 50 prosentinen 70 prosentke deıin kóteriledi. Otbasynyń árbir múshesine shaqqanda osy mejeden tómen turǵandarǵa ataýly kómektiń jańa túri beriledi. Sosyn ondaı otbasylardyń jalpy tabysyn eseptegende basqa áleýmettik tólemder eskerilmeıdi. Budan bólek, áleýmettik kómekti alý sharalary jeńildeıdi. Demek, áleýmettik jaǵynan az qamtylǵan kópbalaly otbasylarda árbir balaǵa 21 myń teńgege jýyq járdemaqy tólenedi. Naqty aıtsaq, 20 789 myń teńge. Ondaı kómekti tórt jáne odan kóp balasy bar otbasylar alady», - dedi Á.Smaıylov jýrnalısterge bergen suhbatynda.
Onyń aıtýynsha, sońǵy eki jyldyń ishinde áleýmettik salaǵa respýblıkalyq bıýdjetten bólingen qarjynyń kólemi 34 prosentten 45 prosentke deıin artty. Aldaǵy úsh jylda atalǵan kórsetkishti 49 prosentke deıin ulǵaıtý josparlanyp otyr.
«Búgin Memleket basshysy qosymsha tapsyrmalar berdi. Sonyń aıasynda áleýmettik jaǵynan az qamtylǵandar, sonyń ishinde kópabalaly otbasylardy qoldaý sharalary kúsheıedi. Prezıdent ataýly kómekti arttyrýdy júktedi. Baspanamen qamtý bar. Jergilikti jerde ınfraqurylymdyq nysandardy salý qajet. Sonyń barlyǵyna aldaǵy eki-úsh jylda qosymsha 2 trıllıon teńge bólinedi. Shamamen 1 trıllıon teńge Ulttyq qordan quıylady», - dep atap kórsetti Á.Smaıylov. Aıta keteıik, búgin Memleket basshysy Nursultan Nazarbaev kópbalaly otbasylarda árbir balanyń tólemaqysyn 21 myń teńgege deıin arttyrýdy tapsyrdy.
«Úkimetke áleýmettik jaǵynan az qamtylǵan azamattardy, ásirese, kópbalaly otbasylardy qoldaý sharalaryn keńeıtýdi tapsyramyn. Atalǵan kórsetkishti kúnkóris deńgeıiniń 70 paıyzyna deıin jetkizýimiz kerek. Al ataýly kómek alyp otyrǵan kópbalaly otbasylardyń árbir balasyna beriletin járdemaqyny 21 myń teńgege deıin ósirýdi tapsyramyn. Atalǵan kómekti barynsha jeńildetý kerek. Halyq ary-beri shapqylap júrmesin. Sosyn ondaı otbasylardyń tabysyn eseptegende basqa áleýmettik járdemaqylardy sanaýdy alyp tastaý qajet. Áıtpese, sonyń bárin sanaǵanda kópbalaly otbasylar baı azamattar bolyp shyǵa keledi», - dep atap kórsetti N.Nazarbaev.
