2019 jyldyń qańtar aıynda Biryńǵaı jınaqtaýshy zeınetaqy qorynyń bazasynda avtomatty túrde 9 409 jeke zeınetaqy shoty ashylǵan.
2019 jyldyń 8 qańtarynan bastap jeke tulǵaǵa mindetti zeınetaqy jarnalary boıynsha shot ashý úshin Biryńǵaı jınaqtaýshy zeınetaqy qoryna, onyń ishinde Qordyń veb-saıty arqyly da júginýdiń qajeti joq. Endi jeke tulǵanyń Qorda mindetti zeınetaqy jarnalary boıynsha ashylǵan shoty joq bolsa, onda alǵashqy jarna kelip túsken kezde zeınetaqy shoty avtomatty túrde ashylady. Bul týraly Qazaqstan Respýblıkasynyń zeınetaqy zańnamasyna tıisti ózgerister engizildi.
Bul rette jeke tulǵa jarnalardy aýdarý barysynda tólem tapsyrmasynyń elektrondyq formatynda kórsetilgen derbes derekter (tegi, aty, ákesiniń aty, jeke sáıkestendirý nómiri, týǵan kúni) boıynsha tanylady. Al jeke tulǵanyń jeke basyn kýálandyratyn qujattyń derektemeleri boıynsha qajetti málimetterdi Qor memlekettik organdardyń aqparattyq júıelerinen alatyn bolady.
Aınash ESALI,
«Egemen Qazaqstan»
ALMATY
