Elimizdiń 43 joǵary oqý ornynan 200 adam «Joǵary oqý ornynyń úzdik oqytýshysy» ataǵynyń ıegeri boldy. Olardyń qatarynda 36 ǵylym doktory, 133 ǵylym kandıdaty, 29 PhD doktory, 2 magıstrant bar.
«Bolashaq kilti óskeleń urpaqtyń qolynda. Olardyń boıyna bilim nárin sińirip, izgilik nuryn taratýshy – sizder. Muraty bıik muǵalimder qaýymyna qajyrly eńbegi úshin shyn júrekten alǵysymdy aıtamyn. Bárińizge zor densaýlyq, shyǵarmashylyq tabys tileımin», dedi Bilim jáne ǵylym vıse-mınıstri Talǵat Eshenqulov.
Baıqaýǵa qatysqan oqytýshylardyń ǵylymı-pedagogıkalyq qyzmeti sapalyq jáne sandyq kórsetkishteri boıynsha baǵalandy. Onyń ishinde, oqýlyqtardy, monografııalardy, oqý quraldaryn aǵylshyn tilinde ázirleý, qatysý jáne basyp shyǵarý, kásibı qyzmeti boıynsha shet tilindegi jappaı ashyq onlaın kýrstardyń platformasy bazasynda kýrstan tabysty ótkeni týraly sertıfıkattyń bolýy eskerildi.
Atalǵan grant joǵary oqý oryndarynyń oqytýshylaryna ǵylymı-zertteý jumystaryn júrgizý úshin jáne biliktilikterin arttyrýǵa álemniń jetekshi ýnıversıtetterinde taǵylymdamadan ótýge múmkindik beredi.
Raýan QAIDAR,
«Egemen Qazaqstan»
