Prezıdenttiń ornyn bosatýyn talap etti
Seısenbi, 7 aqpan 2012 8:03
Sırııa oppozısııasy áskerı bólimshelerdiń Homs qalasyn bombalaýy saldarynan kem degende úsh adamnyń qaza tapqanyn habarlady. Keıbir derek kózderinshe, opat bolǵandar sany 10 adamdy quraýy yqtımal.
Homstyń bir turǵynyna silteme jasaǵan Katardyń «Ál-Jazıra» telearnasy ótken demalys kúnderi Sırııada kem degende 88 adamnyń qazaǵa ushyraǵanyn jarııa etti. Jalpy, bul aqparattardyń anyq-qanyǵyna kóz jetkizý qıyn. Osy aralyqta AQSh prezıdenti Barak Obama Sırııa basshysy Bashar Asadty beıbit adamdardyń ólimine kináli dep aıyptap, onyń otstavkaǵa ketýin talap etti.
Seısenbi, 7 aqpan 2012 8:03
Sırııa oppozısııasy áskerı bólimshelerdiń Homs qalasyn bombalaýy saldarynan kem degende úsh adamnyń qaza tapqanyn habarlady. Keıbir derek kózderinshe, opat bolǵandar sany 10 adamdy quraýy yqtımal.
Homstyń bir turǵynyna silteme jasaǵan Katardyń «Ál-Jazıra» telearnasy ótken demalys kúnderi Sırııada kem degende 88 adamnyń qazaǵa ushyraǵanyn jarııa etti. Jalpy, bul aqparattardyń anyq-qanyǵyna kóz jetkizý qıyn. Osy aralyqta AQSh prezıdenti Barak Obama Sırııa basshysy Bashar Asadty beıbit adamdardyń ólimine kináli dep aıyptap, onyń otstavkaǵa ketýin talap etti.
Ýgo Chaves Argentına jaǵyna shyǵady
Venesýela prezıdenti Ýgo Chaves Ulybrıtanııaǵa qarsy yqtımal soǵys jaǵdaıynda Argentına jaǵyna shyǵatynyn málimdedi. «Venesýela – sonshalyqty qýatty derjava emes, biraq ımperıalısterdiń kez kelgen basqynshylyq áreketine qarsy turýǵa erik-jigeri jetedi», dedi osy máselege oraı Ý.Chaves.
Venesýela basshysynyń bul ustanymy Ulybrıtanııa men Argentına talasyp otyrǵan Folklend araldaryna qatysty janjaldyń qaıtalanýy múmkindigine túsinikteme bergen kezinde bildirildi. Argentına men Ulybrıtanııa arasyndaǵy Folklend araldaryna baılanysty kıkiljiń aqpan aıynyń basynda osynda áskerı qyzmetin óteý úshin hanzada Ýılıam kelgennen keıin ýshyǵa túsken edi.
Rýmynııa úkimeti otstavkaǵa ketti
Rýmynııa úkimeti eldegi ekonomıkalyq turaqtylyqty qamtamasyz etý úshin otstavkaǵa ketedi, dep málimdedi osy eldiń premer-mınıstri Emıl Bok. Onyń málimdeýinshe, mundaı qıyn sheshimge Rýmynııanyń bolashaǵy úshin barýyna týra kelip otyr.
Bok áriptesterin saıası sheshimtaldyq tanytýǵa shaqyryp, olarǵa jańa úkimet quramyn tezirek anyqtaý qajettigin atap kórsetti. Jyl basynan beri Rýmynııada Bok úkimeti men el prezıdenti Traıan Beseskýge qatysty kóptegen narazylyq aksııalary jalǵasqan bolatyn. Demonstranttar eldi daǵdarystan qutqarýǵa baǵyttalǵan qatań ekonomıka sharalaryna qarsy kóterilgen edi. E.Bok el úkimeti basyna 2009 jyly kelgen edi.
Ulttyq kelisim úkimetin basqara ma?
Palestına avtonomııasynyń basshysy Mahmýd Abbasqa HAMAS qozǵalysymen birlesip qurylyp jatqan ulttyq birlik úkimetiniń premer-mınıstri laýazymy usynyldy. Bul usynysty Katar ámiri sheıh Hamad ál-Tanı Mahmýd Abbaspen jáne HAMAS qozǵalysy saıası bıýrosynyń basshysy Haled Mashalmen kezdesýi barysynda jasaǵan.
Abbas bul usynys týraly oılanyp kórýge ýáde bergen. Keıbir derek kózderi Abbas pen Mashal qazirdiń ózinde qaǵıdatty turǵyda kelisimge qol jetkizgenin málimdep otyr. Osylaısha Palestına avtonomııasynyń basshysy premer laýazymyn da ıelenbek. Kelissóz barysynda Ulttyq birlik úkimetindegi basqa oryndarǵa kimder baratyny týraly talqylaý júrmegenge uqsaıdy.
Saılaýda Saýlı Nıınıste jeńiske jetti
Fınlıandııa prezıdentin saılaýda 63 jastaǵy konservator Saýlı Nıınıste jeńiske jetti. 5 aqpanda ótken saılaýdyń ekinshi týrynda Koalısııalyq partııa múshesi Nıınıstege saılaýshylardyń 63 paıyzǵa jýyǵy óz daýystaryn bergen.
Onyń qarsylasy, «Jasyldar odaǵynyń» ókili Pekký Haavısto shamamen 37 paıyz daýys jınaǵan. Sóıtip, ol óziniń jeńilisin sózsiz moıyndaǵan. Saılaýǵa daýys berýge quqy bar halyqtyń 69 paıyzy qatysqan. Bul josparlanǵannan aıtarlyqtaı az. Saılaýshylarǵa aýa raıynyń qolaısyzdyǵy da keri áser etken sekildi. S.Nıınıste buǵan deıin qarjy mınıstri, parlament spıkeri jáne ádilet mınıstri bolǵan.
«Ingýshter genosıdi» talqylanady
Grýzııa parlamenti 1944 jylǵy ıngýshterdiń deportasııasyn taný týraly másele qaramaq. Osy jyly ıngýshterdiń RSFSR men Ortalyq Azııa respýblıkalaryna kúshtep qonys aýdarylǵandary belgili. Talqylaý aqpan aıynyń sońyna belgilengen.
Bul usynystyń avtorlary osyndaı sheshim qabyldaý tarıhı ádilettilik bolyp tabylatynyn atap kórsetedi. Biraq Grýzııa parlamentindegiler bul usynystyń qanaǵattandyrylatynyna kúmánmen qaraıdy. Máselen, Grýzııa parlamentindegi dıasporalar máseleleri jónindegi komıtet tóraǵasy Nýgzar Sıklaýrıdiń pikirinshe, bul óte kúrdeli másele. Komıtettiń mundaı máseleni óz moınyna alýy da qıyn. Sondyqtan nátıjeniń oń sheshiletinine senim az.
Qysqa qaıyryp aıtqanda:
* Mysyr basshylyǵy eldiń eks-prezıdenti Hosnı Múbárakti áskerı gospıtaldan Kaırdegi túrme aýrýhanasyna aýystyrýmen baılanysty daıyndyq jumystaryn bastap ketken. Kópshilik burynǵy el basshysynyń gospıtaldaǵy jaǵdaıy tym jaqsy ekenin jaqtyrmaǵan sekildi.
* Germanııa prezıdenti Krıstıan Výlfke 2010 jyly Skoda avtokóligin jalǵa alýyna baılanysty mınıstrlik zańyn buzdy degen kúdik bildirildi. Tómengi Saksonııanyń premer-mınıstri bolyp turǵan kezinde Výlf máshıneni ishki baǵam boıynsha alsa kerek. Tómengi Saksonııanyń mınıstrlik zańy boıynsha, mınıstrler men kabmın basshysyna qyzmetine oraı syılyqtar men basqa da jeńildikter alýǵa quqy joq.
* Qazirgi kezde, birinshi kezekte, aýa raıynyń qolaısyzdyǵyna baılanysty Eýropa elderi gaz tapshylyǵyn sezine bastady. Osy problemaǵa baılanysty Ýkraına premer-mınıstri Nıkolaı Azarov óz eline de zalaly tımeıtindeı ahýal qalyptastyra otyryp, «Gazpromǵa» Eýropany otynnyń qajetti kólemimen qamtamasyz etýge qoldan kelgen kómegin jasaıtynyn málimdedi.
* Fılıppınde magnıtýdasy 6,8 balldyq jer silkinisi tirkeldi. Sýnamı paıda bolý qaýpi týraly eskertý jasalǵan joq. Ázirshe bir adamnyń ǵana opat bolǵany jaıynda aqparat bar.
Internet materıaldary negizinde ázirlendi.
