Medısınalyq saqtandyrý qorymen birlesip osy jáne ózge de suraqtarǵa jaýap izdep kórdik. «Bul jerde jergilikti emhanalar mańyzdy ról atqarady. Josparly em qabyldaý úshin azamattar tirkelgen emhanasyna barýy tıis. Medısınalyq kómektiń bul túri sozylmaly aýrýlarmen aýyratyn pasıentterge kórsetiledi. Ýchaskelik dáriger sizdi qarap, analız tapsyrýǵa joldama beredi.
Bul pasıentti aýrýhanaǵa jatqyzý qajettigin rastaý úshin qajet. Tekserýden ótkennen keıin dárigerińiz sizge joldama jazyp beredi», deıdi «Áleýmettik medısınalyq saqtandyrý qory» KEAQ basqarýshy dırektory Zabıra Orazalıeva.
Aıtýynsha, jatyp emdeletin aýrýhanany da ýchaskelik mamannyń kómegimen tańdaýǵa bolady. Osydan keıin joldama «Aýrýhanaǵa jatqyzý bıýrosyna» tirkeledi. Bıýro asıenttiń aýrahanaǵa qaı kúni jatqyzylatynyn kóbine avtomatty túrde anyqtaıdy. Al, onkologııalyq, psıhıatrııalyq, narkologııalyq dıspanserler, teri-venerologııalyq jáne juqpaly aýrýlar aýrýhanasy syndy mamandandyrylǵan klınıkalarǵa jatý úshin stasınar qyzmetkeriniń kómegi qajet.
Ári qaraı ne isteý kerek?
Pasıenttiń qolyna talon beriledi. Talondaǵy biregeı kodty engizip, kezekti https://bg.eisz.kz/ saıty arqyly baqylap otyrýǵa bolady. Kezek kelgenge deıin dárigerdiń bergen barlyq nusqaýlaryn oryndap, muqııat daıyndalý qajet. Stasıonarda emdelýge kedergi keltiretin jaǵdaılar týyndap jatsa, ol týraly emdeýshi dárigerge erterek habarlaǵan durys.
Aýrýhanaǵa jatarda
Jeke kýáligińizdi, aýrýhanaǵa jatqyzý talonyn, joldama men dıagnostıkalyq zertteýlerdiń qorytyndysyn ózińizben birge ala barýdy umytpańyz. Eger basqa qaladaǵy stasıonarǵa baryp emdeletin bolsańyz, bıletti erterek qamdap qoıǵan durys. О́ıtkeni, Medısınalyq saqtandyrý qory jolǵa ketetin shyǵyndardy tólemeıdi, deıdi Zabıra Orazalıeva.
Qandaı jaǵdaıda júıe joldama berýden bas tartýy múmkin?
– Pasıent qajetti tekserýlerden ótpegen bolsa. Eger erterek eskertilse stasıonar pasıentti bir táýlikke deıin kúte alady. Osy ýaqyt ishinde tıisti analızderden ótip úlgerýge tyrysyńyz. Áıtpese ótinim kúshin joıady.
– Aýrýhanaǵa jatatyn tusta juqpaly aýrýmen aýyryp qalsa. Mysaly, ótkir respıratorlyq vırýstyq ınfeksııa juqtyryp alǵan pasıentter qabyldanbaıdy.Mundaıda aıyqqannan keıin qaıta habarlasý qajet.
– Stasıonarda jatyp emdelýge qajetti kórsetilimder bolmasa. Eger qujattardy rásimdeý barysynda josparly emge jatqyzýdan bas tartsa Qordyń Halyqpen jumys jónindegi departamentiniń kómegine júginýge bolady.
