«Endevaskýlıarlyq ádispen mı tamyrlary anevrızmi men moıyn tamyrlarynyń tarylýyn emdeý» sheberlik saǵaty kezinde «Qazaqstannyń 100 jańa esimi» jobasynyń jeńimpazy, joǵary sanattaǵy dáriger-neırohırýrg, «OKA» AQ neırohırýrgııalyq ortalyǵynyń jetekshisi Myńjylqy Berdiqojaevtyń qatysýymen birneshe otanyń jańa túri jasaldy.
– Endevaskýlıarlyq ota, ıaǵnı tamyrishilik ádispen mı tamyrlaryn, tinderin tespeı, kespeı-aq ota jasaýǵa múmkindik beredi. Jáne osy arqyly densaýlyqqa tónetin qaýip barynsha azaıady, – deıdi Myńjylqy Saılaýuly. – Endevaskýlıarlyq hırýrgııanyń mánisine kelsek, dárigerler mundaı kúrdeli otany jasaǵan kezde, naýqastyń aǵzasyna pyshaq tıgizbeı-aq, qan tamyrlary arqyly júrip otyrady. Adam aǵzasyndaǵy san arterııasy, sırek jaǵdaıda uıqy arterııalary arqyly kúre tamyrlarǵa eki mıllımetrlik kateter salynady. Jińishke kateter qolqa tamyrmen mı tamyrlaryna deıin aparylady da, dáriger kózge kórinbes kateter ushyndaǵy mıkroquralmen qajetti áreketterin júzege asyrady. Sondaı-aq qanǵa jiberilgen kontrastyq suıyqtyq arqyly hırýrgtar kateterdiń qımylyn rentgen apparatymen baqylap otyrady.
Qazirgi tańda endevaskýlıarlyq emdeý ádisi neırohırýrgııada mı tamyrlary anevrızmin emdeý barysynda úlken suranysqa ıe. Anevrızm – bul mı qan tamyrlarynyń tozyp, sozylýynyń nátıjesinde tompaıyp paıda bolatyn kesel. Bul qaltashyq jarylyp ketken jaǵdaıda mıǵa qan quıylady.
Dál qazirgi tańda «Sovmınka» neırohırýrgııa ortalyǵynyń joǵary sanattaǵy dárigerleri mundaı zamanaýı medısınalyq prosesterdi jaqsy meńgerip, endevaskýlıarlyq otalardyń barlyq ádisterin sátti júzege asyryp otyr.
Al joǵarydaǵy sheberlik dárisi kezinde Qazaqstan, Italııa, Ýkraına men Latvııanyń neırohırýrgtary ózara tamasha tájirıbe almasty.
Aınash ESALI,
«Egemen Qazaqstan»
ALMATY
