О́ńirdegi áleýmettik jaǵdaıy tómen otbasylarǵa qamqorlyq tanytý, qolynan is keletin, jeke kásibin ashýǵa nıetti, biraq múmkindigi joq jandarǵa qoldaý kórsetý maqsatyndaǵy aksııa aıasynda ár kásipker bir jyl boıy 10 otbasyna shama-sharqynsha kómek qolyn sozbaq. Sóıtip ál-aýqaty tómen otbasylarynyń jaqsy ómir súrýine talpynysyn oıatyp, aıaqqa turyp ketkenshe kómektesedi. Tek bir jolǵy qarjy berip nemese azyq-túlik alyp berý emes, olardyń kúnkórisin jaqsartýǵa baǵyttalǵan naqty sharalar uıymdastyrý baǵytyndaǵy kásipkerlerdiń áleýmettik kómek berýi túrli baǵytta júzege asady.
– Aksııanyń «Jaqsylyq jasa, qaıyrymy qaıtar Alladan» dep atalýynyń ózinde úlken mán jatyr. Qaıyrymdylyq qanymyzda bar qasıet bolǵandyqtan, óńirdiń kásipkerleri birigip, izgi sharany qolǵa alyp otyrmyz. Maqsat – osy sharany basynan aıaǵyna deıin jetkizý. Kásipker retinde talpynǵan, kásippen aınalysamyn degen otbasylarǵa kómekteskimiz keledi. Batyldyǵy, jigeri mol adamdar kóp, tek istiń basyn qalaı bastaryn bilmeı júr. «Bulaq kórseń – kózin ash» degendeı, olar alǵashynda sál demep jiberýdi, baǵyt kórsetýdi qajet etedi, – deıdi jobaǵa atsalysýshylardyń biri, kásipker Isa Bımyrzaev.
Shara barysynda aksııaǵa qatysý úshin meshitten, jumyspen qamtý ortalyqtarynan suratý arqyly turmystyq jaǵdaıy, kúnkóris deńgeıi tómen, tipti erteńgi as-sýyn qalaı tabaryn bilmeı otyrǵan, kómekke zárý 300 otbasy iriktelip alyndy, olardyń 90-ǵa jýyǵy Jańaózen qalasynda turady. Búginde Jańaózen qalasyndaǵy birneshe otbasyna páter syıǵa tartylyp, birneshe úıde jóndeý jumystary bastaldy. Jeke bıznesin ashqysy keletin «Rahat» aýylynyń turǵyny Naýryz Aldabergenovke kásipker Samat Musabaev jylyjaı salýǵa kómektesetin boldy. Sondaı-aq aksııaǵa bıýdjet qarjysy jumsalmaıdy, kásipkerlerdiń jeke qarajatynan kómek kórsetiledi.
Kásip ashý úshin joba jasaǵanymen, ony júzege asyrýǵa qarjysy bolmaǵan otbasylardyń basym bóligi mal sharýashylyǵymen, qus ósirýmen, tiginmen aınalysýǵa nıet bildirdi. Al aksııany qolǵa alǵan kásipkerler turǵyndarǵa qajetti quraldardy, sharýashylyq júrgizý úshin mal, qus satyp alyp beredi, qora men jylyjaı da salyp beredi. Qaıyrymdylyq jasaýda mújálsiz otbasylarǵa bir rettik kómek kórsetýmen, ıaǵnı azyq-túlik taratýmen shekteletin izgilik isiniń aýqymyn ulǵaıtyp, naqty iske negizdelgen aksııa «balyqshyǵa balyq berme, qarmaq ber» degen ustanymǵa arqa súıeıdi. Aksııany respýblıka deńgeıinde júzege asyrýdy kózdep otyrǵan uıymdastyrýshylar aldymen Mańǵystaý oblysynyń barlyq aýdandaryn, shalǵaı aýyldaryn aralamaq.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
