Jıynda aımaqtyq jáne qazaqstandyq ıntegratorlar derekterdi avtomatty túrde óńdeýge arnalǵan zamanaýı tehnologııalardy jáne jasandy ıntellekt múmkindikterin qoldanatyn ozyq sıfrly ınnovasııalyq sheshimderdi tanystyrdy. Qazaqstannyń ónerkásip salasyndaǵy kóshbasshylary sanalatyn Arcelor Mittal, Qazsınk holdıng, Chemtech syndy kompanııalardyń basshylary ónerkásipti sıfrlandyrýǵa baǵyttalǵan álemdik trendterdi ortaǵa salyp, óndiristik úderisterdi uıymdastyrýǵa arnalǵan jańa tehnologııalardy engizý tóńireginde oı almasty.
− Sońǵy jyldary sıfrly transformasııa dáýiri qarqyndy damyp keledi. Kóptegen uıymdar búginde dástúrli bıznes úlgileriniń ózgerýin bastan ótkerip, sıfrly tehnologııalar kómegimen básekege qabiletti bolýǵa talpynýda. Qazaqstan 2050 jylǵa deıin eń damyǵan 30 memlekettiń qataryna qosylýdy josparlap, «Sıfrly Qazaqstan» strategııasyna basymdyq berip otyrǵanyn eskeretin bolsaq, eldegi óndiris salasynyń transformasııadan ótip jatqandyǵy erekshe mańyzǵa ıe, – dedi Maıkrosofttyń Qazaqstannyń seriktester arnasyn damytý jónindegi menedjeri Natalıa Matasova. Onyń aıtýynsha, ónerkásiptik mekemelerge IT mamandar usynatyn baǵdarlamalar men sıfrly negizdegi jobalar baǵasy jaǵynan da qoljetimdi.
«ArselorMıttal Temirtaý» AQ qarjy dırektorynyń orynbasary Nestor Komarıskııdiń aıtýynsha, búgingi jańa tehnologııalar iri ónerkásip oshaqtaryndaǵy qaýipsizdikti qadaǵalap otyrýǵa múmkindik beredi.
− Bizdiń mekeme qyzmetkerlerdiń qaýipsizdigin birinshi orynǵa qoıady. Búginde jańa tehnologııalar arqyly adamdardyń qaýipsizdigin saqtaýǵa arnalǵan túrli qanatqaqty jobalar bar. Biz de bul úderisten qalys qalmaımyz. Bir ǵana mysal, beınebaqylaýdyń kómegimen zaýytqa kirgen ár adamnyń qaýipsizdik erejelerin qanshalyqty saqtaǵanyn anyqtaýǵa bolady. Búginde kompanııada 4 myńǵa jýyq oryn avtomattandyrylǵan. Al jalpy alǵanda óndiris oshaǵynyń tolyqtaı, ıaǵnı 100 paıyz sıfrlanýy úshin áli 20-25 jyl kerek. Eń bastysy, turmysymyzǵa jańadan engen tehnologııalyq tóńkeristiń kásipkerlik salaǵa berer oń yqpaly baryn uǵynǵan abzal, – dedi ol.
Jıynda Qazaqstan ekonomıkasynyń jetekshi ındýstrııalyq sektorynda robot tehnıkasyn qoldaný mysalynda jasandy ıntellekt múmkindikteri de tanystyryldy.
Erkejan AITQAZY,
«Egemen Qazaqstan»
