Jıynda alǵashqy bolyp baıandama jasaǵan Túrkistan qalasynyń ákimi Álipbek О́serbaev Túrkistan qalasy aýmaǵynda jańadan 10 gúlzar salynatynyn jetkizdi. Sondaı-aq, shahardy kógaldandyrý maqsatynda 30 myńǵa jýyq túp aǵash kóshetteri otyrǵyzylǵan.
Kóktemgi dala jumystary boıynsha málimdegen oblystyq aýyl sharýashylyǵy basqarmasynyń basshysy Nurbek Badyraqov aǵymdaǵy jyly aýyl sharýashylyǵy daqyldaryn 823,3 myń gektarǵa, ıaǵnı ótken jyldan 9,8 myń gektarǵa artyq ornalastyrý josparlanyp otyrǵandyǵyn jetkizdi.
«Kúzdik egis 164,5 myń gektarǵa egildi. Jer aıdaý jumystary 510,8 myń gektarǵa josparlanyp, 501,2 myń gektar jer aıdaldy. Jer aıdaý jumystary áli de jalǵasýda. Búgingi kúnge 67,2 myń gektar jazdyq daqyldar egildi. Kóktemgi dala jumystaryn júrgizýge tonnasy 193 myń teńgeden 38 myń tonna janar jaǵarmaı bólinip, operatorlar anyqtaldy. Agroqurylymdarǵa jetkizip berýdi qosa alǵanda lıtrine 165-167 teńgeden bosatylýda. Bul naryqtyq baǵadan 22-24 teńgege arzan», - dedi basqarma basshysy.
Aýyl sharýashylǵyna baılanysty oblys ákimi jerdi ıgerý boıynsha aýdandaǵy jumystardy synǵa aldy. Ásirese, Arys, Báıdibek, Saryaǵash aýdandarynda jer ıgerý tómen deńgeıde ekenin atap ótip, aýdan basshylary atalǵan saladaǵy jumysty rettemese qatań shara kóriletindigin aıtty. Sondaı-aq, sýbsıdııalardy ýaqytyly alý ákimderdiń tikeleı jaýapkershiligi ekenin eskertti.
Sonymen qatar, jıynda óńirdegi az qamtamasyz etilgen jáne kópbalaly analardy áleýmettik qamtamasyz etý boıynsha baıandama jasaǵan oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Muhıt Otarshıev oblysta jańa formattaǵy ataýly áleýmettik kómek taǵaıyndaý jumystary joǵary deńgeıde uıymdastyrylyp jatqandyǵyn jetkizdi.
«Oblysta jalpy 86,6 myń kópbalaly otbasy bar. Bul respýblıkalyq kórsetkishtin 25 paıyzyn quraıdy. Olardyń ishinde 16,5 myń otbasy az qamtylǵan qatarynda. Respýblıkada 571,6 myń adam ataýly áleýmettik kómek alsa, onyń 34,2 paıyzy Túrkistan oblysynyń turǵyndary. Elimiz boıynsha ataýly áleýmettik kómekke 28 mlrd.teńge taǵaıyndalǵan, onyń 15,7 mlrd teńgesi (56%) oblystyń úlesinde. Sondaı-aq, óńirde ótken jyly 29 627 adam jumyspen qamtý sharalaryna tartylyp, turaqty jumyspen 26 508 adam qamtyldy. Bul respýblıka deńgeıinde eń joǵarǵy kórsetkish» , - dedi Muhıt Otarshıev.
Oblysta ataýly áleýmettik kómekti tıimdi paıdalaný úshin shartty aqshalaı kómektiń birjolǵy tólemine basymdyq berilýde. Basqarma basshysynyń aıtýynsha, óńirde ázirlengen 15 kishi bıznes jobanyń iske asyrý nátıjesinde 26 459 otbasy iri jáne ýaq mal sharýashylyǵymen, 4243 otbasy qyzmet kórsetý salasynda kásibin damytýda.
Elbasynyń tapsyrmasyna sáıkes, ataýly áleýmettik kómek alýshy otbasylardyń balalaryna aı saıyn 20 789 teńge kepildendirilgen kómek tóleý boıynsha suratylatyn qujattardy ońtaılandyrý arqyly ataýly áleýmettik kómek taǵaıyndaý rásimi jeńildetilgen. Bul úshin E-halyq aqparat júıesi aýdan, qalalardyń okrýgterinde engizilýde.
Jıyndy qorytqan oblys ákimi áleýmettik kómek rásimin ońtaılandyrýǵa baǵyttalǵan E-halyq aqparat júıesin engizý boıynsha merziminen keshigip jatqan aýdan, qala basshylaryna jedeldetý qajettigin tapsyrdy. Sondaı-aq, oblystaǵy az qamtamasyz etilgen jáne kópbalaly otbasylarǵa áleýmettik kómekti úlestirý jumystary zańdy, ári ádiletti bolý qajettigin júktedi.
