Ý.Mozer ár jyldary AQSh memlekettik hatshysynyń orynbasary qyzmetin atqarǵan, sonymen birge Amerıkanyń Ýkraına, Qazaqstan, Mysyr, Sýrınam jáne Malıdegi elshilikterinde jumys istegen, AQSh-tyń Moldovadaǵy elshisi laýazymynda bolǵan.
TMD keńistigindegi qyzmetteri áser etken bolar, Ýılıam Mozer orys tilin meńgergen eken.
Qazaqstan Prezıdentine senim gramotasyn tapsyrý saltanatynan keıin jýrnalıster aldyna shyqqan elshi osydan 20 shaqty jyl buryn Almatydaǵy elshilikte jumys istegendigin jáne Qazaqstanǵa asqan yqylaspen oralǵandyǵyn, sonymen birge Qazaqstan Prezıdenti Qasym-Jomart Toqaevqa senim gramotasyn tapsyrý ózine zor mártebe ekendigin atap ótti.
– Meniń Qazaqstanǵa alǵash kelgen jáne sońǵy bolǵan ýaqytymnyń aralyǵynda Qazaqstan zor tabystarǵa qol jetkizgendigin atap ótkim keledi, – degen Ý.Mozer elordanyń biregeıligi men zamanaýı arhıtektýralyq qurylymyna tánti bolǵandyǵyn jasyrmady.
– Qazaqstannyń ótken órkendeý jyldary meni qatty tańǵaldyrdy. Osy ýaqytta halyqtyń jaǵdaıy jaqsaryp, ál-aýqaty arta túsken. Biz Qazaqstanmen aradaǵy keń strategııalyq áriptestikti joǵary baǵalaımyz, – dedi AQSh elshisi.
Sonymen qatar Qazaqstannyń Tuńǵysh Prezıdentiniń memleketter arasyndaǵy baılanysty nyǵaıtýdaǵy jetistikterine erekshe toqtaldy.
– Biz Nursultan Nazarbaevtyń strategııasyn, ıadrolyq qarýdy taratpaý boıynsha Qazaqstandy jahandyq kóshbasshy qylýdaǵy eńbegin joǵary baǵalaımyz. Bul mindettemeler bizdiń áriptestigimizdiń negizi bolyp qala beredi. Biz, sonymen qatar Qazaqstannyń amerıkalyq kompanııalar tarapynan keletin kommersııalyq ınvestısııalarǵa ashyqtyǵyn atap ótkimiz keledi, – dedi AQSh elshisi.
Dıplomat óz sózinde Qazaqstannyń tek Ortalyq Azııa ǵana emes, sonymen birge halyqaralyq arenada kóshbasshy memleketke aınalǵandyǵyn atap ótti. Onyń ishinde elimizdiń kóptegen halyqaralyq prosesterdegi, BUU Qaýipsizdik Keńesindegi belsendiligi, barlyq jahandyq kıkiljińderdiń beıbit sheshilýiniń jaqtaýshysy retindegi rólin joǵary baǵalaıtynyn aıtty.
AQSh elshisi sóziniń sońynda: «Qazaqstannyń Tuńǵysh Prezıdenti Nursultan Nazarbaevqa birneshe ondaǵan jyl danalyqpen elge basshylyq jasaǵany úshin qurmetim men rızashylyǵymdy bildirgim keledi. Ol eń qıyn kezeńderdiń ózinde Qazaqstandy táýelsizdikke, egemendikke, gúldenýge bastady. Qurmetti Prezıdent Qasym-Jomart Toqaevpen birlesken jumysymyz jemisti bolaryna senim artamyn», dep aǵynan jaryldy.
* * *
Sondaı-aq Memleket basshysy Qasym-Jomart Toqaev Qytaı Halyq Respýblıkasynyń Qazaqstandaǵy Tótenshe jáne ókiletti elshisi Chjan Sıaomen kezdesti.
Kezdesý barysynda Qasym-Jomart Toqaev Qazaqstan men Qytaı arasyndaǵy qarym-qatynastardyń qarqyndy damyp kele jatqanyna toqtalyp, eki el halyqtarynyń ıgiligi jolyndaǵy baılanystardyń odan ári nyǵaıa túsetinine senim bildirdi.
Tótenshe jáne ókiletti elshi Chjan Sıao Qasym-Jomart Toqaevqa Qazaqstan Respýblıkasynyń Prezıdenti laýazymyna kirisýine baılanysty Qytaı Halyq Respýblıkasynyń Tóraǵasy Sı Szınpınniń quttyqtaýyn jetkizip, dostyq pen strategııalyq seriktestik rýhyndaǵy ekijaqty yntymaqtastyqty damyta túsýge kúsh salatynyn aıtty.
Serik ÁBDIBEK,
«Egemen Qazaqstan»
