«Innovasııalyq tehnologııalar parki» arnaıy ekonomıkalyq aımaǵyn aralaý kezinde «KBTU Drilling Center» oqý-jattyǵý ortalyǵy men munaı-gaz salasynyń mamandary biliktiligin arttyratyn Qazaqstandyq teńiz akademııasyn baryp kórdi. Asqar Mamın radıoelektronıka, ushqyshsyz basqarylatyn ushý apparattaryn, kompozıt buıymdardy, kún elektr stansııasy nysanyn shyǵaratyn «KazTechInnovations» JShS zaýytyna bardy. «Aqparattyq tehnologııalar parki» AEA ákimshilik ortalyǵynda Úkimet basshysyna osy aımaq aýmaǵynda ornalasqan kásiporyndardyń qyzmetiniń baǵyttary týraly baıandaldy.
Rysqulov dańǵyly men Qulja kúre joly boıyndaǵy jol aıryǵyn kórý kezinde QR Premer-Mınıstri kólik shemasyn damytý týraly aqparatty tyńdady, sondaı-aq, Abaı dańǵyly men B. Momyshuly kóshesiniń qıylysynyń mańynda ornalasqan «Dostyq» metrosy beketiniń qurylysyn kórdi. Uzyndyǵy 3,1 km «Saryarqa» jáne «Dostyq» metrosynyń jańa beketteri metropolıtendegi jolaýshylar aǵynyn táýligine 46 myń adamnan 86 myńǵa deıin ulǵaıtýǵa jol ashady. QR Premer-Mınıstri Almatyda qoǵamdyq kóliktiń damýy men jeńil relsti kólik (JRK) qurylysy jobalaryn iske asyrý jónindegi baıandamalardy tyńdady.
A. Mamın «Qazjeńilónerkásip-Almaty» JShS kıim shyǵarý fabrıkasyna jáne qalanyń ındýstrııalyq aımaǵynyń birqatar kásiporyndaryna bardy. Atap aıtqanda, Tokyo Rope Manufacturing korporasııasynyń ınjenerlik qorǵanys júıelerin óndirý zaýytyn kórdi, jeńil avtokólik óndiretin «Hyndai Trans Kazakhstan» zaýytynyń qurylys alańdarynda boldy, sondaı-aq dıametri 300 mm-den 900 mm-ge deıin úlken bolat dánekerli qubyrlar óndirisi jolǵa qoıylatyn Asia Steel Pipe kásipornyna bardy. Zaýyt jyl saıyn munaı, gaz, sý jáne munaı ónimderin tasymaldaý jáne taý-ken óndirisi, qurylys, hımııa ónerkásibi, energetıka salalarynda paıdalaný úshin 100 myń tonnaǵa deıin qubyr jetkizetin bolady. Jumys sapary elektr avtobýstaryn qurastyratyn «Falcon Eurobus» JShS zaýytynda jalǵasyn tapty. Munda QR Premer-Mınıstrine úshinshi býynnyń elektr avtobýstarynyń modelderi kórsetildi.
Almatyda QR Premer-Mınıstri Almaty óńiriniń týrıstik taý klasteriniń perspektıvalyq nysandaryn ushyp aralady, sonymen qatar ony damytýdyń ózekti máseleleri jóninde keńes ótkizdi. Keńes jumysyna Almaty qalasy men Almaty oblysynyń týrıstik bıznes-qaýym ókilderi qatysty.
