Abaı atyndaǵy Memlekettik akademııalyq opera jáne balet teatryndaǵy sahnalyq kostıýmderdiń kórmesi – Rýdolf Nýreevtiń mereıtoıyna arnalǵan festıvaldiń negizgi is-sharalarynyń biri. Nýreevtiń kostıýmderi Fransııanyń ulttyq qazynasy bolyp sanalady: asyl matalar, qaıtalanbas sán úlgisi, tańdaýly kesteler jáne sahnada uzaq ýaqyt qoldanylýy olardy balet álemindegi jarqyn, emosııalyq jáne talassyz qubylysty baıandaıtyn biregeı jádigerlerge aınaldyrdy.
ArtClassic jáne Ballet Globe Dance Festival III Halyqaralyq festıvaliniń bas prodıýseri Erlan Andaǵulov: «Nýreevtiń qýatty joıqyn horeografııasy kostıýmderdiń pishimine de qatysty erekshe kózqarasty talap etti. Kórermen tańdanyp, al bıshiniń qımyldary erkin bolýy tıis edi. Sondyqtan Nýreevtiń kostıýmderi er adam músininiń symbatyn erekshe kórsetip, bılegen kezde erkin qozǵalatyn arnaıy pishimdi qajet etetin edi. Nýreevtiń sahnalyq kıimi árbir jańa partııasynda iske asyratyn balet dástúrleriniń qısyndy jalǵasyna aınaldy» deıdi. Kórme qonaqtaryna árbir jádigerdiń tarıhy men erekshelikteri týraly tálimgerlik dáris usynylady.
Abaı atyndaǵy MAOBT ǵımaratyna qoıylatyn sahnalyq kostıýmder kórmesimen qatar, fotograf Franse Leveniń (Francette Levieux) Nýreevtiń shyǵarmashylyǵyna, onyń «Baıaderkadaǵy», «Aqqý kólindegi», «Romeo men Djýlettadaǵy» eń tanymal partııalaryna arnalǵan ekspozısııalary da qonaqtardyń nazaryna usynylady. Leve óz eńbekterinde bıshiniń erekshe darynyn, energetıkasy men tartymdylyǵyn ǵajap saqtap qala alǵan, kórermenderge balet ańyzynyń dáýirine boılap, 50 jyl buryn álemdik sahnalarda qanat jaıǵan ortaǵa súńgip ketýge múmkindik beredi.
Atap aıtqanda, festıval baǵdarlamasy balet ónerin qadirleıtinderdi J.Korallı men J.Perronyń horeografııasyndaǵy A. Adannyń «Jızel» spektaklimen, kompozıtor L.Mınkýstyń mýzykasyna baletmeıster Aleksandr Gorskıı qoıǵan «Don-Kıhot» baletimen, sondaı-aq, zamanaýı horeografııadan alynǵan sıýjettermen qýantady.
Rýdolf Nýreevtiń mereıtoıyna arnalǵan Ballet Globe III halyqaralyq festıvali Almaty tórinde Parıjdiń ulttyq operasynyń, Nıderlandy bı teatrynyń (NDT), Vengrııa Ulttyq Operasynyń, «Astana Opera» MOBT-nyń, Reseıdiń Úlken teatrynyń, Jenevanyń Úlken teatry jáne Monte-Karlo Baletiniń etýaldary men jetekshi solısteriniń basyn qosady.
Almatydaǵy Ballet Globe III Halyqaralyq festıvaliniń qurmetti qonaǵy – Nýreevke eń jaqyn adamdardyń biri, onyń shákirti, «Grand-opera» juldyzy, esimi ańyzǵa aınalǵan horeograf jáne Bordo Operasy balet trýppasynyń jetekshisi Sharl Jıýd. Onyń qatysýymen festıval kúnderi shyǵarmashylyq kezdesýler, fılmderdiń kórsetilimderi jáne baletten biregeı sheberlik sabaqtary ótedi.
Festıvaldi Fransııanyń Almatydaǵy Bas konsýldyǵymen birlese otyryp, Almaty qalasy ákimdiginiń qoldaýymen ArtClassic kompanııasy uıymdastyryp otyr.
