«Bizdiń mindetimiz – Elbasy baǵytyn jalǵastyrý. Eldiń jetistikteri men ulylyǵy. Bul úshin negiz qalanǵan. Bes ınstıtýttyq reforma, Ult jospary – «Qazirgi zaman memleketi barlyǵy úshin» qabyldandy, qoǵam áleýmettik jáne rýhanı jańǵyrtýǵa belsendi kiristi. Elbasyna bizdiń eń jaqsy qoldaýymyz – Qazaqstan ıgiligi úshin adal jáne jankeshti jumys atqarý. Bizdiń elimizdegi áleýmettik-ekonomıkalyq jáne saıası reformalar jetistiginiń daýsyz negizi retinde Nursultan Nazarbaevtyń esimi berilgen Qoǵamdyq kelisim men jalpyulttyq birliktiń qazaqstandyq modeli boldy. Qazaqstan halqy Assambleıasynda júzege asyrylǵan ol barlyq azamattardyń etnostyq jáne dinı tıistiligine qaramastan naqty teńdiginiń pármendi tetigine aınaldy. Búgin biz damýdyń jańa kezeńine qadam bastaımyz. Bizge Elbasynyń strategııalyq baǵytynyń sabaqtastyǵyn qamtamasyz etý mańyzdy», dedi ol.
QHA Hatshylyǵynyń basshysy sonymen qatar Qazaqstan Prezıdenti Qasym-Jomart Toqaev ant qabyldap, óńir ákimderimen alǵashqy keńesin ótkizgenin tilge tıek etti.
«Memleket basshysy atap ótkendeı, áleýmettik ádil memleketke baǵyt odan ári jalǵasady. Ony keshendi iske asyrý «Nurly jol» baǵdarlamasy, Elbasynyń Jastar jylynyń ashylýynda jáne Nur Otan partııasynyń XVIII sezinde bergen Bes áleýmettik bastamalar men tapsyrmalar aıasynda júzege asyrylady. Sonymen qatar Elbasy atap ótkendeı, ultaralyq qaqtyǵysqa baılanysty jekelegen áreketter erekshe alańdaýshylyq týǵyzyp otyr. Mundaı arandatýshylyq quqyq tártibi organdary tarapynan da, ıdeologııalyq sharalarmen de tez arada bógelýi kerek», dedi J.Túımebaev.
Budan bólek atalǵan uıym Tóraǵasynyń orynbasary QHA jumysyn jańa sapaly deńgeıge shyǵarý, árbir qazaqstandyqtyń eldegi ózgerýler úderisterine qatystylyǵyn qalyptastyrý boıynsha qyzmetine QHA-nyń barlyq qurylymynyń belsendi qatysýy qajettigin atap ótti.
Assambleıa Tóraǵasynyń orynbasary 2019 jyly 29 sáýirde ótetin «Beıbitshilik pen kelisim formýlasy: áleýmettik birlik jáne jańǵyrtý» atty QHA XXVII sessııasynyń mańyzdylyǵyna toqtaldy.
«Bul sessııa bizdiń elimizdegi qoǵamdyq kelisim men jalpyulttyq birlikti odan ári nyǵaıtýdy qamtamasyz ete otyryp, saıası kún tártibindegi mańyzdy oqıǵa bolýy tıis. Osyǵan oraı ony joǵary ıdeologııalyq jáne uıymdastyrýshylyq deńgeıde ótkizý qajet», dedi atalǵan spıker.
Sonymen qatar J.Túımebaev Qazaqstan halqy Assambleıasynyń aǵymdaǵy qyzmeti men aldaǵy kezeńge arnalǵan mindetterin tilge tıek etti. Atap aıtqanda, kezdesý barysynda «Qazaqstan halqy Assambleıasy týraly» zańdy iske asyrý máseleleri talqylandy. Birinshi kezekte – osy zańǵa ózgerister men tolyqtyrýlardy iske asyrý jónindegi is-sharalar josparyn oryndaý tur.
Sondaı-aq Elbasynyń 2018 jylǵy 5 qazandaǵy «Qazaqstandyqtardyń ál-aýqatyn arttyrý: tabys pen ómir súrý sapasyn arttyrý» atty Qazaqstan halqyna Joldaýyn iske asyrý jónindegi Assambleıanyń jalpyulttyq is-sharalar josparyn, Jastar jylyn ótkizý jónindegi Jol kartasyn, «Rýhanı jańǵyrý» baǵdarlamasyn iske asyrýdyń 2019 jylǵa arnalǵan is-sharalar josparyn iske asyrýǵa qatysý máseleleri talqylandy.
Keńes otyrysynda QHA-nyń barlyq qurylymynyń: Qoǵamdyq kelisim keńesiniń, analar keńesteri, jýrnalıster klýbtary, medıatorlar, QHA kafedralary, ǵylymı-saraptamalyq toptar, máslıhattardaǵy depýtattyq toptar, kásipkerler qaýymdastyqtary, QHA «Jańǵyrý joly» qozǵalysy men etnomádenı birlestikter belsendileriniń jumysyn jandandyrý máseleleri qaraldy.
Jıyn sońynda QHA-nyń óńirlik assambleıalary úshin úlgi-model retinde Nur-Sultan qalasy, Qostanaı, Qyzylorda oblystary QHA hatshylyǵynyń meńgerýshileri atqarylǵan jumys týraly baıandasa, shyǵystan kelgen maman óńirdegi Dostyq úıiniń jumys tájirıbesimen bólisti.
