Qasym-Jomart Toqaev jýrnalıster aldynda sóılegen sózinde Qazaqstan Respýblıkasynyń Prezıdenti retinde Reseı Federasııasyna jasaǵan alǵashqy saparynyń sımvoldyq mánin atap ótip, eki el arasyndaǵy qarym-qatynastardyń erekshe sıpatyn aıtty.
– Máskeýge resmı saparmen kelýge shaqyrǵan Reseı Federasııasynyń Prezıdenti Vladımır Pýtınge, sondaı-aq qonaqjaılyq kórsetip, jyly qabyldaǵany úshin reseılik dostarymyzǵa rızashylyq bildiremin. Bul sapar eki taraptyń da odaqtastyqty odan ári damytyp, Qazaqstan men Reseı halyqtarynyń dostyq baılanystaryn nyǵaıtýǵa umtylatynyn kórsetti, – dedi Memleket basshysy.
Qasym-Jomart Toqaev qatysýshylarǵa Qazaqstannyń Tuńǵysh Prezıdenti – Elbasy Nursultan Nazarbaevtyń Memleket basshysy ókilettigin toqtatý týraly sheshimi jóninde aıtty jáne bul qadam Qazaqstannyń keleshegi úshin jasalǵan saıası danalyq pen úlken jaýapkershiliktiń jarqyn úlgisi bolyp tabylatynyn erekshe atap ótti.
– Bul tarıhı oqıǵa álemdik qoǵamdastyqtyń bizdiń elimizge zor qurmetpen qaraýyna túrtki boldy. Búginde Nursultan Nazarbaev barsha Qazaqstan halqynyń ystyq yqylasyna bólenip, qoldaýyna ıe bolyp otyr. Ol Elbasy mártebesinde Qaýipsizdik Keńesiniń jáne Nur Otan basqarýshy partııasynyń tóraǵasy laýazymyndaǵy óziniń aýqymdy qyzmetin atqara beredi, – dedi Qazaqstan Prezıdenti.
Memleket basshysy óziniń Prezıdent retindegi qyzmeti Qazaqstan men Reseı arasyndaǵy yntymaqtastyqtyń «altyn ǵasyrynda» bastalǵanyn atap ótip, Nur-Sultan men Máskeýdiń jan-jaqty dıalogyn nyǵaıtý jónindegi strategııalyq baǵdardy jalǵastyrýǵa jáne buǵan deıingi qol jetkizilgen ýaǵdalastyqtardyń sabaqtastyǵyn qamtamasyz etýge zor nıettestik bildiretinin aıtty.
Sonymen birge, Qasym-Jomart Toqaev Qazaqstanda Reseı kapıtalynyń qatysýymen munaı jáne hımııa, jeńil ónerkásip, aýyl sharýashylyǵy, avtomobıl jáne temirjol mashınalaryn jasaý salasyndaǵy 100-ge jýyq birlesken jobalardy iske asyratyn 9 myńnan astam kásiporynnyń jumys isteıtinin atap kórsetti.
Qazaqstan Prezıdenti Reseı tarapymen aradaǵy kelissózderdiń taqyryby bolǵan eki eldiń ónerkásip kooperasııasy jáne ınvestısııalyq yntymaqtastyq máselelerine arnaıy toqtaldy.
– Búgin taraptar qol qoıǵan Qazaqstan-Reseı ónerkásip kooperasııasy salasyndaǵy birlesken is-qımyldar baǵdarlamasy osy baǵyttaǵy jumysqa tyń serpin beredi. Bul baǵdarlamanyń júzege asyrylýy traktorlardyń, avtobýstardyń, avtomobılder men basqa da kólik quraldarynyń óndirisin arttyrýǵa, sondaı-aq elimizde qosymsha jumys oryndaryn ashýǵa múmkindik beredi, – dedi Memleket basshysy.
Memleket basshysy Qazaqstan men Reseıdiń geografııalyq ornalasý ereksheligine toqtala otyryp, eki eldiń kólik-tranzıt áleýeti básekege qabiletti mańyzdy basymdyq ekenine toqtaldy, sondaı-aq osy múmkindikti tıimdi paıdalaný qajettigine nazar aýdardy.
– Bizdiń elderimiz arqyly Eýrazııanyń Batysy men Shyǵysyn baılanystyratyn «Batys Eýropa – Batys Qytaı» avtomagıstrali asa mańyzdy kólik kúre joly bolyp tabylady. Biz shekaralyq ruqsattama núkteleri jumysynyń tıimdiligin arttyrý máselesine de nazar aýdardyq. Bul bizdiń azamattarymyzdyń shekara arqyly ótýin jeńildetýge múmkindik beredi, sondaı-aq óńiraralyq saýda-sattyqty damytýǵa yqpal etedi, – dedi Qasym-Jomart Toqaev.
Budan bólek, Qazaqstan Prezıdenti energetıka jáne janar-jaǵarmaı sektorynda ózara is-qımyl jasaýdyń perspektıvalaryna, sondaı-aq eki eldiń áskerı-tehnıkalyq jáne ǵarysh salasyndaǵy yntymaqtastyǵyna, sonyń ishinde Baıqońyr qalasyn gazben qamtamasyz etý máselelerine arnaıy toqtaldy.
Memleket basshysy Qazaqstan men Reseıdiń týrızm salasyndaǵy yntymaqtastyǵy týraly aıta kele, osy salanyń damýyna qajetti múmkindikterdiń mol ekenin atap kórsetti jáne týrıstik, kólik-logıstıkalyq ınfraqurylymdy damytý, sondaı-aq eki eldiń shıpajaılaryn nasıhattaý jumystaryn júrgizý qajettigine basa nazar aýdardy.
Qazaqstan Prezıdenti ekijaqty mádenı-gýmanıtarlyq baılanystardy odan ári nyǵaıtý máselelerine de toqtaldy.
– Kelissózder barysynda Qazaqstanda qoldanbaly ǵylymdarǵa arnalǵan birlesken oqý ornyn ashý máselesi talqylandy, qazaqstandyq ártisterdiń Sankt-Peterbýrgtegi Mýzyka Úıinde bilim alýy jáne Qazaqstannyń Ulttyq murajaıynda Ermıtaj kúnderin ótkizý múmkindikteri qarastyryldy, – dedi Qasym-Jomart Toqaev.
Sońynda Qazaqstan Prezıdenti júrgizilgen kelissózderdiń nátıjesine kóńili tolatynyn aıtyp, qol jetkizilgen kelisimder Qazaqstan men Reseıdiń dostastyqqa, senimdilikke, tatý kórshilikke jáne odaqtastyqqa negizdelgen yntymaqtastyǵyn odan ári nyǵaıtýǵa yqpal etetinine senim bildirdi.
Vladımır Pýtın óz sózinde Qasym-Jomart Toqaevqa Reseı Federasııasyna alǵashqy resmı saparmen kelgeni úshin rızashylyq bildirdi.
– Kelissózder qazirgi Qazaqstan memleketiniń negizin qalaýshy, Qazaqstan Respýblıkasynyń Tuńǵysh Prezıdenti Nursultan Ábishuly Nazarbaevpen birlesip jemisti jumys istegen jyldarda qalyptasqan dástúrge tolyǵymen saı keletin syndarly jáne iskerlik jaǵdaıda júrgizilgenin atap ótkim keledi, – dedi Vladımır Pýtın.
Reseı Prezıdenti qabyldanǵan birlesken málimdemede Reseı men Qazaqstannyń keń aýqymdy strategııalyq seriktestigin nyǵaıtýdy kózdeıtin ózara kelisim kórinis tapqanyn, sondaı-aq ony odan ári damytý úshin naqty jáne jaýapty mindetter qoıylǵanyn atap ótti.
– Jemisti jáne mazmundy kelissózder úshin Qazaqstan Prezıdentine jáne Qazaqstannan kelgen bizdiń áriptes dostarymyzǵa shynaıy rızashylyǵymdy bildirgim keledi. Bizdiń kezdesýimizdiń nátıjeleri baýyrlas eki el halyqtarynyń ıgiligi úshin Reseı men Qazaqstannyń odaqtastyq qarym-qatynastaryn nyǵaıtýǵa septigin tıgizetinine senimdimin, – dedi Vladımır Pýtın.
***
Sapar qorytyndysy boıynsha mynadaı qujattarǵa qol qoıyldy:
1. Qazaqstan Respýblıkasynyń Prezıdenti Qasym-Jomart Toqaev pen Reseı Federasııasynyń Prezıdenti Vladımır Pýtınniń birlesken málimdemesi.
2. Reseı-Qazaqstan óndiristik kooperasııasy salasyndaǵy birlesken is-qımyl baǵdarlamasy.
3. Qazaqstan Respýblıkasynyń Úkimeti men Reseı Federasııasynyń Úkimeti arasyndaǵy «Baıqońyr» keshenin gazben jabdyqtaý jónindegi kelisim.
4. Qazaqstan Respýblıkasynyń Sıfrlyq damý, qorǵanys jáne aeroǵarysh ónerkásibi mınıstrligi men Reseı Federasııasynyń О́nerkásip jáne saýda mınıstrligi arasyndaǵy Kásiporyndardyń ǵylymı-tehnıkalyq kooperasııasy salasyndaǵy ekijaqty yntymaqtastyq jospary.
