Shıeli kentinde memlekettik rámizder alańynyń ashylý saltanaty ótti. Rámizder alańynda Memlekettik Eltańba, Memlekettik Gımnniń mátini jáne bıiktigi 23 metr bolatyn Memlekettik Tý ornalasqan.
«Qazaq eliniń táýelsizdik alyp, álem elderimen tereze teńestirip, shekarasyn shegendep, birligin bekemdep, memlekettik rámizderin bekitkenine bıyl 28 jyl tolady. Bul - az ýaqyt bolǵanymen, álem kartasynda Qazaqstan degen derbes memlekettiń bar ekeniniń biregeı belgisi. Tuńǵysh Prezıdentimiz Nursultan Ábishuly Nazarbaevtyń: «Táýelsizdik – Altyn kúmbez deıtin bolsaq, sol kúmbezdi tirep turǵan tórt belgi rámizderimiz bar, onyń birinshisi – Eltańba, ekinshisi - Ánuran, úshinshisi – Kók Baıraq, tórtinshisi – Qazaq tili» degen halyq júreginen oryn alǵan dana sózi bar. Rámizder halyqtyń rýhy men aıbatyn bildirip qana qoımaı, sol memlekettiń álemdik órkenıet kóshindegi orny men deńgeıin de belgileıdi. Búgin, mine, Kók Baıraǵymyzdy bıikke kóterip, Memlekettik Rámizder alańyn ashqaly turmyz», dedi aımaq basshysy.
Aıta keteıik, alańda kent turǵyndary men qonaqtarynyń jaılylyǵy úshin barlyq jaǵdaı jasalyp, irgeles aýmaq qorshalǵan, jasyl jelekter otyrǵyzylyp, demalýshylarǵa arnalǵan oryndyqtar ornatylǵan. Bul jer memlekettik jáne quqyq qorǵaý organdary qyzmetkerleriniń ant qabyldaý, áskerge shaqyrylýshylardy shyǵaryp salý jáne basqa da patrıottyq is-sharalar, resmı merekelik jıyndar ótkiziletin orynǵa aınalady.
Rámizder alańynyń ashylý rásiminde sot salasynyń ardageri Turmat Baımaǵambet aýdan turǵyndaryn quttyqtady.
Esterińizge sala keteıik, ótken jyly rámizder alańy Qazaly jáne Aral aýdandarynda ashylǵan edi, keleshekte barlyq 7 aýdanda da salynatyn bolady.
Sonymen qatar, búgin «Rýhanı jańǵyrý» alleıasy ashyldy. Onda 11 metrlik «Qazaq eli» men «Qazaq handyǵy» monýmenti, Qazaq halqynyń ejelgi dáýiri, laıdbokstarda Táýelsizdik jyldaryndaǵy qabyldanǵan tarıhı sheshimder kezeńi jazylǵan. Irgeles aýmaq abattandyrylyp, kógaldandyryldy.
Jumys sapary barysynda aımaq basshysy jeke kásipker «B.Áshirbekov» kúrish aqtaý zaýytynyń jumysymen tanysty. Zaýyt ótken jyldyń jeltoqsan aıynda kásipker qarajatyna salynǵan. Nysanda 12 adam jumys isteıdi. Kásiporyn táýligine 86 tonna aqtalmaǵan kúrish óńdeıdi jáne 28 tonna jarma óndiredi.
