Halyqaralyq sý sporty túrleri federasııasy (FINA) aqpan aıynda jańa týrnırdiń tanystyrylymyn usynǵan bolatyn. Jarysqa kez-kelgen sportshy qatysa almaıdy. Tek uıymdastyrýshylardyń shaqyrtýyn alǵan úzdikter ǵana baq synaıdy. Iаǵnı, júzden júırik, myńnan tulpar shyqqan myqtylar ǵana ózara kim myqtyny anyqtamaq.
Álemdik týrnır qatysýshylarynyń arasynda Olımpıada chempıondary, álem birinshiliginiń jeńimpazdary, rekordshylar men FINA reıtıngisiniń byltyrǵy kóshbasshylary bar. Elıtaly top qataryna 2016 jylǵy Rıo Olımpıadasynyń chempıony Dmıtrıı Balandın de kirdi.
«Qazirgi tańda FINA uıymdastyrýymen Qytaı, Vengrııa jáne AQSh-ta ótetin úsh jarysqa daıyndyq ústindemin. Bul júzý sportyndaǵy jańa týrnır, jańa format. Sondyqtan, mundaı aıtýly dodada Qazaqstan atynan synǵa túsý men úshin úlken mártebe. Jańa maýsymǵa degen daıyndyǵym oıdaǵydaı. Bıyl ótetin jarystar tizbegi de mol. Myqtylar arasynda synǵa túsip, jyldyń eń mańyzdy básekelerine daıyndyǵymdy shyńdaımyn», - deıdi Balandın.
Álemdik federasııa usynǵan týrnır formaty olımpıadalyq synnan ózgeshe. Naqtylap aıtatyn bolsaq, árbir qashyqtyqta sportshylar bir ret júzý múmkindigin alady. Jeńiske bar bolǵany tórt sportshy ǵana úmitker bolmaq. Jarysta sportshylar 14 qashyqtyq boıynsha baq synaıdy.
Búginde álemdegi 109 sportshy Champions Swim Series dodasyna qatysýǵa kelisim berdi. Dmıtrıı Balandın ózi Olımpıada chempıony atanǵan 200 metrge brass ádisimen júzýden synǵa túsedi. Onyń qarsylastary qatarynda Olımpıadanyń qola júldegeri, reseılik Anton Chýpkov, 2017 jylǵy álem chempıonatynyń qola júldegeri ári osy qashyqtyqtaǵy rekord ıesi, japonııalyq Ippeı Vatanabe jáne qysqa qashyqtyqta 2018 jylǵy álem chempıonatynyń kúmis júldegeri atanǵan qytaılyq Sın Haııan bar.
Jarys úsh kezeńnen turady. Alǵashqy báseke 27 sáýir kúni Qytaıdyń Gýanchjoý qalasynda ótpekshi. Týrnırde 2019 jyly ótetin álem chempıonaty men 2020 jylǵy Olımpıada oıyndaryna qatysý múmkindigin beretin lısenzııa oınatylady.
Týrnırdiń ekinshi kezeńi 11-12 mamyr kúnderi Býdapeshtte, sońǵy kezeńi 31 mamyr men 1 maýsym aralyǵynda Indıanapolıste uıymdastyrylady.
Jeńiske jetken sportshy 10 myń, kúmis júldeger 8 myń, qola júldegeri 6 myń dollar kóleminde syıaqy alady.
