Elbasy syrtqy saıası baǵytymyzdyń sabaqtastyǵyn qamtamasyz etýdiń jáne Qazaqstannyń strategııalyq seriktesterimen yntymaqtastyqty nyǵaıtýǵa baǵyttalǵan sharalardy birtindep iske asyrýdyń mańyzdylyǵyna toqtaldy.
– Elimizde eleýli saıası ózgerister boldy. Bıliktiń qalypty ári beıbit jolmen berilýin qamtamasyz etip, búkil álemge Konstıtýsııa aıasynda áreket etetinimizdi kórsettik. Bul – barsha jurt úshin aıtýly oqıǵa. Qazir eń bastysy – osyǵan deıin qalyptasqan syrtqy saıası baǵytymyzdan aınymaý. Eń aldymen, jaqyn kórshilerimizben aradaǵy qatynastarǵa nazar aýdarý kerek. Bul qatynastar ózara senimge negizdelýge tıis, – dedi Nursultan Nazarbaev.
Qazaqstannyń Tuńǵysh Prezıdenti, sondaı-aq, shet elderge jasalatyn saparlarǵa jáne halyqaralyq is-sharalarǵa muqııat daıyndalý qajettigin atap ótti.
– Qazirgi tańda mynadaı máselelerge basa mán berý kerek. Birinshiden, Ońtústik Koreıa Prezıdentiniń Qazaqstanǵa sapary. Ekinshiden, «Bir beldeý, bir jol» forýmyna qatysý úshin Qytaı Halyq Respýblıkasyna jasalatyn sapar. Sonymen qatar, Eýrazııa ekonomıkalyq odaǵynyń mereıtoılyq sammıtin ótkizý úshin jaqsylap daıyndalý kerek. Onyń bes jyldyǵyn elordamyzda atap ótemiz, – dedi Elbasy.
Syrtqy ister mınıstri B.Atamqulov elimizde bolǵan saıası oqıǵalardy halyqaralyq uıymdardyń basshylary oń baǵalap jatqanyn jetkizdi.
– Halyqaralyq uıymdardyń basshylary Qazaqstannyń halyqaralyq mindettemelerdi júzege asyra beretinine senim bildirýde. Álemdik qoǵamdastyq Sizdiń jahandyq bastamalaryńyzdy jáne qaýipsizdikti qamtamasyz etýge qosqan úlesińizdi, sonyń ishinde ıadrolyq qarýsyzdaný men ıadrolyq qarýdy taratpaý isine sińirgen eńbegińizdi joǵary baǵalaýda, – dedi B.Atamqulov.
