Memleket tizginin ustaıtyn basshy eń aldymen halyqqa adal qyzmet etetin bolsa, eldegi demokratııalyq úrdisterdi tereńdete tússe, Tuńǵysh Prezıdentimiz Nursultan Nazarbaevtyń ıgi bastamalaryn júıeli túrde jalǵastyryp áketse degen qalamgerler eń bastysy ana tilimizben salt-dástúrimizdi, ádebıetimiz ben mádenıetimizdi, táýelsizdigimizdi saqtap qalý basty murat ekenin tilge tıek etti.
«Qazaqstan osy jyldar ishinde ekonomıka, saıasat mádenıet sekildi san salada úlken jetistikterge jetken bolsa, ony ári qaraı damytý, belgilengen mejelerge jetkizý de alda turǵan aýqymdy mindet. Búkilhalyqtyq zańdy saılaý ótkizýdiń, zańdy prezıdent saılap alýdyń dál osy jerde tarıhı máni bar. Osy saılaý elimizdegi demokratııanyń qandaı deńgeıde ekenin jalpaq álemge tanytýy kerek. Bul jaǵdaılarǵa ádebıetimizdiń aınalasynda júrgen azamattarymyz at ústi qaraı almaıdy. Olarda ózindik únin qosyp, atsalysýy tıis», – degen Jazýshylar Odaǵynyń tóraǵasy Ulyqbek Esdáýlet, qalamgerlerdi ult rýhanııatynyń qaımaǵy retinde bul máseleden tys qalmaýǵa shaqyrdy. Tańdaýly kezeń aldyndaǵy tarıhı sátti oı talqysyna salǵan basqosýda Maral Ysqaqbaı, Dýlat Isabekov, Qabdesh Jumadilov, Beksultan Nurjekeev, Nurdáýlet Aqysh, Ámına Qurmanǵalıqyzy, Lıýbov Shashkova, Saılaýbaı Tolybaev, Baýyrjan Jaqyp, Mereke Qulkenov, Maraltaı Raıymbek, Aqberen Elgezek syndy aqyn-jazýshylar men taǵy basqa da qabyrǵaly qalamgerler sóz alyp, óz pikirlerin ortaǵa saldy.
– Biz sııaqty jazýshylar qaýymynyń kózqarasymen alsaq qandaı adamnyń prezıdent bolǵany durys. El basqaratyn jan zııaly, mádenıetti bolsa, ultynyń salt-dástúrin, tilin, memleketin syılasa, óz múddesinen halyqtyń múddesin joǵary qoıatyn bolsa, shyn máninde bilimdi adam bolsa mine naǵyz el tutqasyn ustaýǵa laıyq jan dep bilemiz. Elbasy Nursultan Nazarbaev Qasym-Jomart Toqaevty óz ornyna taǵaıyndaǵanda onyń osy talaptar údesinen shyǵa alatyn qaıratker ekenin aıtqan bolatyn. Osyny eskere kele jáne ózindik salmaǵy bar sarabdal saıasatker retinde Toqaevty osy orynǵa laıyq dep esepteýge bolady. Ol kisiniń aıtqan eki sózi kóńilime qondy. Alǵashqysy Túrkistanǵa barǵan saparynda: «Ádilet joq jerde, memleket damymaıdy» degeni, al ekinshisi, birer kún buryn merziminen tys ótetin prezıdent saılaýy týraly málimdegeninde: «Men saılaýdyń ádil, taza, zańǵa saı ótýine kepildik beremin» dep aıtqany. Bul naǵyz azamattyq ustanym dep baǵa berýimizge bolady, – deıdi Memlekettik syılyqtyń laýreaty, jazýshy Beksultan Nurjekeev.
M. Áýezov atyndaǵy Ádebıet jáne óner ınstıtýtynyń bas ǵylymı qyzmetkeri, jazýshy Nurdáýlet Aqysh, Memleket basyna kelgen jańa Prezıdent, Elbasymyzdyń bolashaǵymyzdy baǵdarlaı otyryp, ulttyq bolmysymyzdy saqtaýǵa baǵyttalǵan «Bolashaqqa baǵdar: Rýhanı jańǵyrý», «Uly dalanyń jeti qyry» atty baǵdarlamalyq maqalalarynyń zańdy jalǵasyn taýyp, ary qaraı óristeýine kúsh salsa deıdi. Jazýshynyń pikirinshe, ult muratyna negizdelgen ıgi maqsattar júıeli túrde júzege asar bolsa táýelsizdigimizdi nyǵaıtatyn berik tutqamyz bekı túspek.
Bastysy dúıim jurtty eleńdetip otyrǵan taǵdyrsheshti tańdaý jaqsylyqtarǵa jol ashyp, halqymyz kóldeneń kesapattan aman bolsa ıgi. Osylaı degen qalamgerler aldaǵy kúnderi ult rýhanııatynyń qara shańyraǵy sanalatyn Qazaqstan Jazýshylar Odaǵynyń atynan arnaıy qarar qabyldap, basylym betterine jarııalaıtyndaryn aıtyp tarqasty.
