Jıynda elimizdiń áleýmettik-ekonomıkalyq damýyna jáne ekologııalyq qaýipsizdikti qamtamasyz etýge qatysty máseleler qaraldy.
Nursultan Nazarbaev álemdik qoǵamdastyqtyń elimizdegi saıası oqıǵalarǵa zor qyzyǵýshylyq bildirgenin aıtty.
– Men tarıhymyzdyń osy bir betburysty kezeńinde qazaqstandyqtardyń parasattylyq jáne bereke-birlik tanytqanyna shynaıy rızashylyǵymdy bildiremin. Osy kúnderi meniń atyma memleket jáne qoǵam qaıratkerlerinen, elimizdiń eńbek ujymdarynan kóptegen hat pen jedelhat kelip túsýde. Shet memleketterdiń jáne halyqaralyq uıymdardyń basshylary telefon arqyly habarlasyp, qoldaý bildirip jatyr, – dedi Elbasy.
Qazaqstannyń Tuńǵysh Prezıdenti elimizdiń ósip-órkendeýine jáne ornyqty damýyna baǵyttalǵan baǵdardan memleketimiz aınymaıtynyna senim bildirdi.
– Biz barlyq synaqtan abyroımen ótip, tabysty memleket qura bildik. Ony búkil álem biledi ári qurmetteıdi. Men qazirgi Qazaqstannyń negizin qalaǵandyqtan memleketimizdiń bolashaǵyna jáne azamattarymyzdyń ál-aýqatyna basa mán beremin. Meniń barlyq is-áreketim jáne qadamym osyǵan arnalǵan, – dedi Nursultan Nazarbaev.
Qaýipsizdik Keńesiniń Tóraǵasy Qazaqstan halqynyń múddesi úshin strategııalyq baǵdarlamalardy odan ári júzege asyrýdyń mańyzdylyǵyn atap ótti.
– Baǵdarlamalardy júıeli iske asyrý – damýymyzdyń basty talaby. Biz azamattardy turǵyn úımen, jumyspen, sapaly medısınalyq kómekpen jáne bilimmen qamtamasyz etip, muqtaj adamdarǵa qoldaý kórsetý úshin tıisti jumystardy jalǵastyra beremiz. Munyń bári – jarqyn bolashaqqa degen ınvestısııa, – dedi Elbasy.
Qazaqstannyń Tuńǵysh Prezıdenti el ekonomıkasyn odan ári damytý jáne jahandyq syn-qaterlerdi eńserý úshin jaqsy múmkindikter bar ekenin aıtty.
Basqosýda, Premer-Mınıstrdiń birinshi orynbasary Á.Smaıylov jáne Energetıka mınıstri Q.Bozymbaev baıandama jasady.
Elbasy óńirlerdegi ekologııalyq jaǵdaıdy tıisti baqylaýda ustaý jáne osy saladaǵy zańnamanyń buzylýyna jol bermeý qajettigine nazar aýdardy. Nursultan Nazarbaev bul sharalar, eń aldymen, halyqtyń turmys sapasyn jaqsartýǵa baǵyttalǵanyn atap ótti.
Otyrys qorytyndysy boıynsha Úkimetke, oblystardyń, Nur-Sultan, Almaty, Shymkent qalalarynyń ákimderine naqty tapsyrmalar berildi.
