Sóz basynda Máýlen Áshimbaev kezekten tys prezıdenttik saılaý ótkizý týraly sheshimniń óte oryndy ári ýaqtyly qabyldanǵanyn atap ótti. Sondaı-aq ol Prezıdenttiń bul jaýapty sheshim boıynsha Elbasymen aqyldasqanyna, Parlamenttegi qos palata spıkerimen, Premer-Mınıstrmen keńeskenine, Konstıtýsııalyq Keńestiń kelisimine júgingenine jáne Parlamenttegi partııa jetekshilerimen kezdeskenine nazar aýdaryp, Nur Otan partııasynyń atalǵan tarıhı sheshimdi qoldaıtynyn jetkizdi.
– Bul bıliktiń turaqtylyǵy men eldiń birligin nyǵaıtý úshin qabyldanǵan ýaqtyly ári óte oryndy sheshim. Nur Otan partııasy saılaý naýqanyna tas-túıin daıyn. Ol úshin biz ózimizdiń uıymdastyrýshylyq, kadrlyq, saıası jáne aqparattyq áleýetimizdi paıdalanyp, zań aıasynda jumys isteımiz. Saılaý elimizdegi turaqtylyq pen birliktiń odan ári kúsheıýine oń áserin tıgizip, halyqty Elbasynyń saıasaty aıasynda jańa maqsattarǵa jeteleıdi dep senemiz, – dedi M.Áshimbaev.
Sonymen qatar ol saılaýǵa Nur Otan partııasynyń belsendi túrde qatysatynyn jetkizdi.
– Elimizdegi jetekshi saıası partııa retinde Nur Otan prezıdenttik saılaýǵa belsendi túrde qatysady. Partııa Tóraǵasynyń tapsyrmasyna sáıkes partııamyz saılaýǵa qatysý úshin óz kandıdatyn usynady. Soǵan baılanysty Nursultan Ábishuly Nazarbaev 2019 jyldyń 23 sáýirinde partııanyń kezekten tys XIX sezin shaqyrý týraly Qaýlyǵa qol qoıdy. Sol sezde Nur Otan atynan saılaýǵa qatysatyn kandıdattyń esimi belgili bolady, – dedi M.Áshimbaev.
Nur Otanda ótken jınalysta Elbasy – partııa Tóraǵasy Nursultan Nazarbaev «Baqytty otbasy», «Qutty meken», «Aýyl – el besigi» jáne «Halyqqa kómek» jobalaryn tıimdi júzege asyrý máselelerine arnaıy toqtalǵan edi.
Atap aıtqanda, «Halyqqa kómek» jobasy halyqtyń problemalaryna jan-jaqty ári jedel nazar aýdarý kerek degendi bildiredi. Partııanyń qoǵamdyq qabyldaý bólmeleri bazasynda 234 áleýmettik tereze qurylsa, olarǵa Qazaqstan Respýblıkasynyń kez kelgen azamaty óziniń basynda bar máselelerimen baryp kómek suraýyna bolady. Al jobany júzege asyrý úshin mobıldi toptar qurylǵan. Olarǵa jergilikti atqarýshy organdar men úkimettik emes uıymdardyń ókilderi kiredi. Azamattardyń barlyq ótinish-tilekteri biri qalmaı «osy jerde jáne qazir» qaǵıdaty boıynsha qarastyrylady.
«Aýyl – el besigi» jobasy aýyldaǵy áleýmettik ınfraqurylymdardy damytýǵa, mamandarmen qamtamasyz etýge jáne aýyldy jerlerde jastardyń kásipkerligin óristetýge baǵyttalǵan.
Al «Qutty meken» jobasynyń maqsaty ınjenerlik jáne áleýmettik ınfraqurylymdardy damytý úderisterine partııalyq baqylaý júrgizý bolyp tabylady. Olardy júzege asyrý úshin baqylaýdyń úsh deńgeıli júıesi qurylǵan. Aýdandyq deńgeıde monıtorıng júrgizetin toptar baqylaýdy tikeleı ınfraqurylymdardyń nysandarynda qamtamasyz etedi. Al aýmaqtyq deńgeıde qarjynyń maqsatty jumsalýyn baqylap, aǵymdaǵy jaǵdaıǵa taldaý júrgizedi jáne shekteýli sıpattaǵy usynymdamalar jasaıdy. Ortalyq deńgeıde memlekettik organdar men partııa qurylymdarynyń jobany júzege asyrý barysyndaǵy esepteri tyńdalatyn bolady.
Jıyn sońynda M.Áshimbaev partııanyń Ortalyq apparaty men barlyq deńgeıdegi fılıaldaryna jáne bastaýysh partııa uıymdaryna aldaǵy saılaý naýqanyna qatysty birqatar naqty tapsyrma berdi.
Elbasy anyqtap bergen atalǵan tórt jobanyń basty maqsaty – azamattardyń ál-aýqatyn arttyryp, áleýmettik jaǵdaıyn jaqsartý. Sondyqtan qashanda halyqtyń múddesin birinshi kezekke qoıatyn Nur Otan úshin bul basymdyqtar partııa jumysynyń negizgi baǵyty bolyp sanalady.
