A.Dankan D.Nazarbaevaǵa Ulybrıtanııa Parlamenti Lordtar Palatasynyń lord-spıkeri ser Pıter Norman Foýlerdiń Qazaqstan Parlamenti Senatynyń Tóraǵasy qyzmetine saılanýyna baılanysty quttyqtaýy men izgi tilekterin jetkizdi. Lord-spıkerdiń joldaýynda eki eldiń zań shyǵarý organdarynyń joǵarǵy palatalary arasyndaǵy baılanystardyń odan ári nyǵaıýyna senim bildirildi.
Brıtandyq mınıstr sondaı-aq Qazaqstandaǵy saıası úderister men jańarýlarǵa London tarapyna basa nazar aýdaryp otyrǵanyn atap ótti.
D. Nazarbaeva meımandy Qazaqstanda bolyp jatqan saıası úderister týraly habardar etti. Onyń aıtýynsha, 9 maýsymda ótetin kezekten tys prezıdent saılaýy elimizdiń saıası júıesin damytý jolyndaǵy mańyzdy qadam bolmaq.
Senat Tóraǵasy eldegi saıası júıeniń jańǵyrýynda, ekonomıkalyq jáne áleýmettik reformalarda sabaqtastyq baǵytynyń qamtamasyz etiletinine senim bildirdi. «Elbasynyń uzaq merzimdi strategııasy bizdiń syrtqy jáne ishki saıasatymyzdyń basty negizi bolyp qala beredi», – dep atap ótti D.Nazarbaeva.
Júzdesýshiler ekijaqty qarym-qatynastardyń jaı-kúıi men keleshegin talqylady. Senat Tóraǵasy Qazaqstannyń Eýropadaǵy mańyzdy strategııalyq áriptesi bolyp tabylatyn Birikken Koroldikpen qarym-qatynasynyń dostyq jáne senimdi sıpatyn atap ótti.
A. Dankan óz kezeginde saıası, ekonomıkalyq, qarjylyq, ınvestısııalyq, mádenı-gýmanıtarlyq salalardaǵy yntymaqtastyqty nyǵaıtýdyń aýqymdy keleshegine toqtala kelip, Qazaqstandy Ortalyq Azııadaǵy negizgi memleket retinde atap ótti.
Áńgime barysynda parlamentaralyq baılanystardy damytýǵa nazar aýdaryldy. D. Nazarbaeva Qazaqstan men Ulybrıtanııanyń zań shyǵarý organdarynda jumys isteıtin dostyq toptarynyń jumysyna joǵary baǵa berip, eki el parlamentshileriniń júıeli baılanysyn atap ótti.
Qazaqstan Senatynyń basshysy Birikken Koroldik Parlamentiniń ókildi delegasııasynyń 2019 jyly qyrkúıekte «Úlken Eýrazııa: Únqatysý. Senim. Áriptestik» taqyrybymen Nur-Sultanda ótetin Eýrazııa elderi parlamentteri tóraǵalarynyń 4-shi keńesine qatysatynyna senim bildirdi.
