Búgin S.Seıfýllın atyndaǵy Qazaq agrotehnıkalyq ýnıversıtetinde «Tuńǵysh» atty Qazaqstan Respýblıkasynyń Tuńǵysh Prezıdenti – Elbasy kitaphanasy ekskýrsııa jobasynyń saltanatty ashylý rásimi ótti.
Sharaǵa Elbasy kitaphanasynyń dırektory Á.M.Rahymjanov, S.Seıfýllın atyndaǵy QazATÝ rektory A.Q.Kúrishbaev, Elbasy kitaphanasy dırektorynyń orynbasary K.K.Aktaeva, oqytýshylar men stýdentter qatysty.
Saltanatty is-shara shymyldyǵy Qazaqstan Respýblıkasy Memlekettik kúzet qyzmeti Prezıdenttik orkestriniń áskerı defılesimen ashyldy. Sondaı-aq (Elbasy jeke arhıvynyń qujattarynan jasaqtalǵan) «Qazaqstandaǵy prezıdenttik ınstıtýttyń qurylý jáne damý tarıhy» kórmesi ashyldy.
Kórmeni ashqan Elbasy kitaphanasynyń dırektory, saıası ǵylymdardyń doktory, professor Ámirhan Rahymjanov:
– Táýelsizdik jyldarynda memleket ómirinde oryn alǵan tarıhı oqıǵalardy eskere otyryp, halyqtyń úmiti aqtaldy deýge tolyq negiz bar. Qazaqstan qarqyndy damyp kele jatqan elderdiń qataryna qosylyp, jańasha oılaý men tyń kózqarastyń úlgisine aınaldy. Osy tusta Elbasymyz tańdaǵan prezıdenttik ınstıtýt qoǵam birligin nyǵaıtyp, memleket egemendigin kúsheıtti. Munyń bári Qazaqstannyń álem aldyndaǵy abyroıyn asqaqtatty, - dedi.
Basqarma tóraǵasy A.Kúrishbaev kóshpeli ekskýrsııanyń mańyzdylyǵyna toqtalyp, shara uıymdastyrýshylaryna alǵys bildirdi. «Elbasymyzdyń qaıratkerlik jolyndaǵy barlyq mańyzdy qujattary toptastyrylǵan bul kórmeniń orny erekshe. Igi sharanyń bizdiń oqý orda qabyrǵasynda ótip jatqandyǵy kóńil qýantady. О́skeleń urpaqqa úlken tálim, taǵylym, jiger syılaıtyny anyq», - dep túıindedi Aqylbek Qajyǵululy. Sondaı-aq rektor ýnıversıtettiń ǵylymı jetistikteriniń kórmesimen tanystyrdy.
Qazaqstan Respýblıkasy Tuńǵysh Prezıdenti – Elbasy kitaphanasynyń «Tuńǵysh» kóshpeli ekskýrsııalyq jobasy Memleket basshysynyń jasampaz ıdeıalary men bastamalaryn, kitaphananyń biregeı qorlaryn nasıhattap, kelýshilerdi N.Á.Nazarbaevtyń ómir joly men qyzmetimen tanystyrady.
Stýdentter nazaryna Qazaqstan Respýblıkasynyń Tuńǵysh Prezıdenti-Elbasynyń tarıhı jolyn ashatyn beınehronıkanyń sırek kadrlary, fotosýretter men muraǵattyq qujattar jıyntyǵy usynyldy. Kelýshiler Elbasynyń dańǵyl jolyn beıneleıtin biregeı materıaldar keshenin tamashalap, beınehronıkanyń sırek kezdesetin kadrlarymen, sýretter men arhıv qujattarymen, HH ǵasyrdyń 60-70 jyldaryndaǵy qujattarmen, memlekettik jáne qoǵamdyq nagradalary, N.Á.Nazarbaevqa otandyq jáne sheteldik sportshylar tartý etken syılyqtar toptamasymen tanysty.
Kórmege QR Tuńǵysh Prezıdenti Jeke muraǵatynyń qorynan jáne Elbasy murajaıynyń qorynan alynǵan zattyq buıymdar, fotosýretter, jeke zattar usynyldy.
Shara barysynda kitaphana dırektory Á.M.Rahymjanov «Uly dala ulaǵattary» «Model Nazarbaeva», «Nýrsýltan Nazarbaev. Bıografııa» jáne ózge de kitaptardy syıǵa tartty.
