Premer-Mınıstrdiń orynbasary Gúlshara Ábdiqalyqova jetekshilik etken úkimettik jumys toby Elbasynyń jańa áleýmettik bastamalarynyń negizgi baǵyttaryn túsindirý maqsatynda Shyǵys Qazaqstan oblysyna kelgen edi.
Úkimettik delegasııanyń jumys sapary keshe Semeı qalasynda bastalyp, búgin О́skemende jalǵasty. G. Ábdiqalyqova bastaǵan, Eńbek jəne halyqty əleýmettik qorǵaý mınıstri Berdibek Saparbaev, Densaýlyq saqtaý mınıstri Eljan Birtanov qostaǵan resmı top eń áýeli qaladaǵy oblystyq mamandandyrylǵan medısınalyq ortalyqta 2018 jyly ashylǵan elimizdegi tuńǵysh robottandyrylǵan hırýrgııa ortalyǵynyń jumysymen tanysty. Elordadan kelgen mártebeli meımandar budan keıin D. Serikbaev atyndaǵy Shyǵys Qazaqstan memlekettik tehnıkalyq ýnıversıtetinde oblys aktıvimen kezdesip, Elbasynyń «Nur Otan» partııasynyń kezekti XVIII sezinde júktegen «Áleýmettik qamqorlyq» jańa áleýmettik sharalary jaıynda baıandady. Kezdesýde Eńbek jəne halyqty əleýmettik qorǵaý, Densaýlyq saqtaý, Bilim jáne ǵylym mınıstrleri men Qurylys jáne turǵyn úı-kommýnaldyq sharýashylyq komıtetiniń tóraǵasy ataýly áleýmettik kómek, kópbalaly otbasylarǵa kórsetiletin qamqorlyq, densaýlyq, bilim salalarynda qolǵa alynyp jatqan jumystar týrasynda áńgimeledi. Dóńgelek ústelde Semeıdegi elektrotehnıkalyq kolledjdiń dırektory Azat Sarpekov, «NIET.WOMAN» qoǵamdyq birlestiginiń jetekshisi, kóp balaly ana Elvıra Allahverdıeva men О́skemendegi №38 gımnazııanyń dırektory Inessa Chernysheva sóz alyp, óńirdiń áleýmettik salasynda júzege asyrylyp jatqan sharýalardy tilge tıek etti.
Úkimet basshysynyń orynbasary jumys sapary aıasynda shahardaǵy eki kóp balaly otbasynyń úıine bardy. Jibek joly kóshesinde turatyn Nurlan Jetpisovtiń jubaıy ómirden erte ozyp, búginde bes balaǵa bir ózi bas-kóz bolyp otyrǵan kórinedi. Birneshe jyl páter jaldaǵan О́skemen turǵynyna «VK Tehnogrýpp» JShS-si ózderi salǵan kópqabatty úıdiń birinshi qabatynan eki bólmeli páter syılapty.
Vıse-Premer arnaıy barǵan ekinshi otbasy – qala shetindegi jer úıde 12 bala ósirip otyrǵan Cherkashınder áýleti. «Rodnıchok» sharýa qojalyǵynyń basshysy A.Mıtın bul otbasyǵa kómek qolyn sozyp, qurylys materıaldaryn satyp áperipti. Gúlshara Ábdiqalyqova eki otbasyǵa rızashylyǵyn jetkizip, 150 myń teńgeniń qarjylaı sertıfıkatyn tabys etti.
Úılestirý keńesiniń múgedekterdi qorǵaý salasyndaǵy kóshpeli otyrysy da Úkimettik delegasııanyń qatysýymen О́skemende ótti. Beınekonferensııa baılanysy rejımindegi jıynda 2012-2018 jyldarǵa arnalǵan múgedekterdiń ómir súrýin jaqsartý jáne quqyqtaryn qamtamasyz etý jónindegi is-sharalar josparynyń qorytyndylary shyǵarylyp, 2025 jylǵa deıingi Ulttyq jospardyń jobasy talqylandy.
Budan soń jumys toby músheleri múmkindigi shektelýi balalarǵa arnalǵan «Aqnıet» mektep-ınternatynyń jumysymen tanysyp, balalarǵa arnalyp salynyp jatqan 200 oryndyq aýrýhananyń qurylysyn kórdi.
О́SKEMEN
