Qoǵamdyq keńestiń kóshpeli otyrysyna oblys ákiminiń orynbasary Anton Fedıaev,memlekettik organ, BAQ ókilderi, blogerler qatysty. Polısııa departamenti jáne «Altyn besik» mektepke deıingi mekemesiniń birlesken jobasy aıasynda bóbekter qonaqtarǵa ózderiniń IT-ıdeıalaryn usynyp, qylmys pen quqyq buzýshylyqtardyń aldyn alý boıynsha qurastyrylǵan elektrondy qurylǵylary men aspaptaryn kórsetti.
Polısııa departamentiniń bastyǵy, polısııa general-maıory Berik Bilálov óz sózinde jurtshylyqpen ashyq baılanysqa, erkin oı-pikirlerge erekshe kóńil bólinetinin, ashyqtyq pen servızdik modeldeýdi ditteıtin keshendi is-sharalardy jalǵastyrý qoǵamdyq keńestiń basty mindeti ekenin atap ótti.
«Búgingi tańda polısııa jumysynyń negizgi kórsetkishteriniń biri front-ofıster qyzmetiniń tıimdiligin arttyrý. Polısııaǵa júgingen adam kez-kelgen másele boıynsha bilikti kómek alýy tıis. Osy turǵydan alǵanda petropavldyq polıseılerdiń front-ofısiniń tájirıbesi qoldaýǵa turarlyq», - dedi IIM qoǵamdyq keńesiniń tóraǵasy Marat Qoǵamov.
Qazirgi ýaqytta óńirde 16 front-ofıs jumys isteıdi. Olardyń 13-i aýdandyq polısııa bólimderinde ornalasqan.
Baspasóz-konferensııasynda qoǵamdyq keńes músheleriniń qatysýymen azamattyq qoǵammen ashyq dıalog jasaý, qaýipsizdikti qamtamasyz etý máseleleri talqylandy. Qazaqstan advokattar odaǵynyń prezıdenti Ánýar Túgeldiń aıtýynsha, polısııa qyzmetkerleriniń áleýmettik jaǵynan qamtamasyz etilýi óte mańyzdy. Ol 2 jyl buryn Berik Sultanǵazyulynyń bastamasymen soltústikqazaqstandyq polıseıler úshin jataqhana turǵyzylǵanyn oń baǵalady. Vedomstvolyq turǵyn úıde 50 polıseı otbasy turady. Turǵyndarmen uıymdastyrylǵan eki júzge jýyq jeke kezdesýlerdiń de taǵylymy zor. Osyndaı ashyq dıalogtar túıtkildi problemalardy jedel sheshýge kómektesedi, dedi ol.
Oblysta 1204 beınekamera jumys isteıdi. Olardyń kómegimen bıyl 272 qylmys ashylyp, 3700-den asa ákimshilik quqyq buzýshylyq anyqtaldy. Elektrondyq formatta 367 qylmystyq is aıaqtalyp, 2 myńǵa jýyq ákimshilik hattama toltyryldy. Ishki ister organdaryn jańǵyrtý sheńberinde jeke quram 10 prosentke qysqartyldy.
