JETIM BALALAR ATA-ANASYZ BOLSA DA BASPANASYZ BOLMASYN

Májilistiń Áleýmettik-mádenı damý komıtetiniń jetekshiliginde “Qazaqstan Respýblıkasynyń keıbir zańnamalyq aktilerine otbasy úlgisindegi balalar aýyly jáne jasóspirimder úıleri máseleleri boıynsha ózgerister men tolyqtyrýlar engizý týraly” zań jobasynyń tanystyrylymy ótti. Zań jobasy boıynsha jumys toby­nyń jetekshisi depýtat Baqyt Syzdy­qova otyrysty júrgizdi. Zań jobasymen Bilim jáne ǵylym mınıstrliginiń jaýapty hatshysy Farhat Qýanǵanov tanystyrdy. Respýblıkada otbasy úlgisindegi 6 memlekettik jáne 3 jeke menshik SOS balalar aýyly jumys isteıdi, olarda 600-ge jýyq jetim balalar jáne ata-anasynyń qamqorlyǵynsyz qalǵan ba­lalar tárbıelenýde. Jyl saıyn jetim balalarǵa jáne ata-anasynyń qamqor­lyǵynsyz qalǵan balalarǵa arnalǵan bilim berý ınternattyq uıymdarynyń 9 jáne 11-synyptaryn 2 myńǵa jýyq bala támamdaıdy. Onyń ishinde 400-ge jýyq bala 10-synypta, al 1700-den as­tam bitirýshi kásiptik, tehnıkalyq jáne joǵary oqý oryndarynda oqýlaryn jalǵastyrady. Olardyń 45%-y ǵana otbasy úlgisindegi balalar úıleri men ba­lalar aýylynyń túlekteri retinde jasós­pirimder úılerinde turýǵa quqyǵy bar. Mektep-ınternattary janynda jas­ó­spirimder úılerin derbes mekeme retin­de qurý normasyn engizý turǵyn úıge muqtaj jetim balalar men ata-anasy­nyń qamqorlyǵynsyz qalǵan balalarǵa arnalǵan ınternattyq mekemelerdiń tárbıelenýshileri arasynan barlyq bitirýshilerge 23 jasqa deıin áleýmettik beıimdelýden ótý kezeńindegi turǵyn úı máselesin sheshýge múmkindik beredi. Zań jobasynyń tanystyrylymynda depýtat Gúlnar Seıitmaǵanbetova “Bala­lar 23 jasqa tolǵannan keıin qaıda barady?” degen suraq qoısa, depýtat Tıto Syzdyqov zańda kórsetilgen “Tárbıeshi-ana”degen ataýdyń tárbıe­shiler er adam bolǵan jaǵdaıda ataýy sáıkes kelmeıtinin aıtyp, “Jol kartasy” memlekettik baǵdarlamasyna osy jetim balalar úshin jalǵa beretin bolsa da baspana berýdi qarastyrǵan jón. Ata-anasyz jetim qalǵan balany endi baspanasyz da qaldyrǵan úlken obal bolar”, – dep áriptesterine oı tastady. Depýtat Aldan Smaıyl “Bul zań­nyń eń negizgi tujyrymy – Qazaq­stan­daǵy jetim balalar úıin joıýynda bolǵany. Balalar úıindegi ár balaǵa memleket tarapynan esep-shot ashylyp, oǵan jınalǵan qarjy bala 23-ke tolǵan­da baspana satyp alýyna jetýi kerek”, degen usynys aıtty. Zań jobasynyń qyzý pikirtalasyna komıtet tóraıymy Dınar Nóketaeva men komıtet múshesi Qylyshbaı Bısenov qatysty. Aldaǵy ýaqytta depýtattar óz usy­nystary men pikirlerin jumys tobyna jazbasha túrde túsiretin bolady. Sáýle DOSJANOVA, jýrnalıst.