Senat Tóraǵasy otyrysqa qatysýshylarǵa arnaǵan sózinde jergilikti bılik – memlekettik basqarýdyń negizgi býyny ekenin atap ótti. Ákimshilik reforma jergilikti bılikke eleýli ókilettikter berdi, máslıhattar aýyl, aýyldyq okrýg, aýdandyq mańyzy bar qala deńgeıindegi bıýdjetti derbes qalyptastyra alady. Kommýnaldyq menshikti derbes basqarý; jer resýrstaryn basqarý salasyn baqylaý; lısenzııalaýdyń, atestattaýdyń, basqa da baqylaýlardyń túrleri bar. Alaıda, óńirlerdiń birinshi kezektegi mindetteri tıisti deńgeıde sheshilmeı otyr.
Senat Tóraǵasy Darıǵa Nazarbaeva, sondaı-aq jedel sheshýdi talap etetin aımaqtyq damýdyń birqatar máselelerine, atap aıtqanda óńirlerdiń álsiz ınfraqurylymyna nazar aýdardy. «О́ńirlerdi aýyz sýmen qamtamasyz etý máselelerine táýelsizdik jyldary 540 mıllıard teńgeden astam qarjy jumsaldy. Sonda da kóptegen eldi mekenderge áli kúnge deıin aýyz sý nege jetpegen? Bul baǵdarlama Bermýd úshtaǵany sııaqty, qarajat jumbaq jaǵdaıda joǵalyp ketedi», dedi D.Nazarbaeva.
Senat Halyqaralyq qatynastar, qorǵanys jáne qaýipsizdik komıtetiniń hatshysy, «Qazaqstan máslıhattary depýtattarynyń birlestigi» respýblıkalyq qoǵamdyq birlestiginiń tóraǵasy Tóleýbek Muqashev óziniń baıandamasynda máslıhat depýtattyǵyna kandıdattardy irikteý talaptaryn ózgertý, olardy memlekettik basqarý akademııasynda oqytýdy, máslıhat hatshylarynyń mártebesin arttyrýdy, tekserý komıssııalarynyń jumysyn jetildirý qajettigin atap ótti.
Sondaı-aq Ulttyq ekonomıka mınıstri Rýslan Dálenov, Respýblıkalyq bıýdjettiń atqarylýyn baqylaý jónindegi esep komıtetiniń tóraǵasy Natalıa Godýnova, Túrkistan oblystyq máslıhatynyń hatshysy Qaırat Balabıev, Qostanaı oblystyq máslıhatynyń hatshysy Saılaýbek Eshanov baıandama jasady.
D. Nazarbaeva jergilikti ókildi organdarmen ózara is-qımyl jónindegi keńestiń qyzmetine qarqyn berýge shaqyrdy.
«Keńes jergilikti ózin ózi basqarýdyń qalyptasýy men óńirlik damýdyń ózekti máseleleri talqylanatyn, týyndaǵan máselelerdi sheshý jónindegi usynystar jasalatyn turaqty jumys isteıtin alańǵa aınalýy tıis», dedi Senat basshysy.
Kezdesý qorytyndysy boıynsha usynystar ázirlenetin bolady. Olar merzimi men jaýapkershiligi kórsetiletin naqty sıpatqa ıe bolýy tıis, al senatorlar olardyń iske asýy barysyna turaqty monıtorıng júrgizýdi qamtamasyz etýi tıis, dep tapsyrdy Senat Tóraǵasy.
Kezdesý sońynda Parlament Senaty janyndaǵy Jergilikti ókildi organdarmen (máslıhattarmen) ózara is-qımyl jónindegi keńes pen «Qazaqstan máslıhattary depýtattarynyń birlestigi» respýblıkalyq qoǵamdyq birlestiginiń Yntymaqtastyq týraly memorandýmǵa qol qoıý rásimi boldy.
