General Anders jáne… «Polonez»
«Ogınskııdiń polonezi» dese, kózi ashyq, kókiregi oıaý jurttyń esine mıllıondardyń ortaq muń-zaryna aınalǵan ásem áýen orala ketedi. Onyń jan tebirenter saz ekenin kezinde osy attas fılm de barshaǵa pash etken. Búgin sol áýenniń tarıhyna áýestikpen qaıta úńilsek, polıaktardyń «polonez» degen sózi qazaq halqynyń «atajurtty ańsaý» degenine jaqyn keledi eken. Mine, álemdegi án men kúı áýesqoılarynyń qulaqtarynyń quryshyn qandyrǵan belgili áýenniń túpki máni men maǵynasy qaıda jatyr deseńizshi?!.
«Ogınskııdiń polonezi» dese, kózi ashyq, kókiregi oıaý jurttyń esine mıllıondardyń ortaq muń-zaryna aınalǵan ásem áýen orala ketedi. Onyń jan tebirenter saz ekenin kezinde osy attas fılm de barshaǵa pash etken. Búgin sol áýenniń tarıhyna áýestikpen qaıta úńilsek, polıaktardyń «polonez» degen sózi qazaq halqynyń «atajurtty ańsaý» degenine jaqyn keledi eken. Mine, álemdegi án men kúı áýesqoılarynyń qulaqtarynyń quryshyn qandyrǵan belgili áýenniń túpki máni men maǵynasy qaıda jatyr deseńizshi?!. Tarıhı uqsastyqqa da tańǵalasyz. Belgili mýzykant Mıhaıl Kleofas Ogınskıı óziniń osy ataqty polonezin, kezinde, polıak jerindegi Kostıýshko kóterilisin basyp-janshyǵan jat jerlik áskerlerden qýǵyn kórgen ýaǵynda týǵan jerine degen saǵynyshyn jetkizý úshin jazsa, bizdiń búgingi kishkentaı maqalamyzdyń úlken keıipkerine aınalyp otyrǵan polıak jáne orys generaly Vladyslav Anders te Keńes Odaǵyndaǵy saıası rejimniń qysymynan qýǵyn-súrgin kórip, týǵan eli – Polshanyń azattyǵyn ańsaýmen armanda ótken qolbasshy bolypty. Qaısar general 1941 jyly bastalǵan soǵysqa KSRO eli atynan qatysýdy da qalamaǵan. Tipti, I. V. Stalınniń qaharynan da qaımyqpaǵan. Ony tarqatyp aıtsa, tańnyń áńgimesi. Aqyry general Anderstiń armııasy taratylyp, sardarlary men sarbazdary úrkinshilikke ushyratylady. Sol áskerdiń bir shoǵyry, ıaǵnı qýǵyn-súrginge ushyraǵan polıaktarǵa Qazaqstannyń Merki aýdanyndaǵy Sypataı batyr aýylynan topyraq buıyrypty dep kim oılaǵan. Al 500-ge jýyq polıak jaýyngeri Taraz qalasyndaǵy zırattarǵa jerlenipti.
Jaqynda Merki aýdanynda polıaktar úshin aty ańyzǵa aınalǵan general Vladyslav Anderstiń armııasyndaǵy tarydaı shashyrap, jetken jerinde kóz jumǵan jaýyngerlerdiń qabirinen alynǵan topyraqty Polsha eliniń astanasy Varshavaǵa jetkizip, qaıta jerleýge arnalǵan jıyn ótti. Jıynǵa «Polonez» polıak etnomádenı birlestiginiń músheleri, soǵys ardagerleri jáne óńir basshylary qatysty. Polshanyń elimizdegi Bas konsýly Veslav Osýhovskı, «Polonez» polıak etnomádenı birlestiginiń basshysy Larısa Kalkova jáne Qazaqstan halqy Assambleıasy Hatshylyǵynyń oblystaǵy ókili Larısa Lysova polıak jaýyngerleriniń el men jer turǵysyndaǵy ójettigi men órligin qanquıly NKVD-nyń ózi syndyra almaǵanyn tebirene sóz etti.
Kósemáli SÁTTIBAIULY,
«Egemen Qazaqstan».
Jambyl oblysy,
Merki aýdany,
Sypataı batyr aýyly.
–––––––––––––––––
Sýrette: general
Vladyslav Anders.
