«Rýhanı jańǵyrý» baǵdarlamasy aıasynda «Qoǵamdyq kelisim» RMM, T.Júrgenov atyndaǵy Qazaq ulttyq óner akademııasy Qazaqstan tarıhy jáne áleýmettik ǵylymdar kafedrasynyń, Nazarbaev ýnıversıteti Almaty qalasyndaǵy ókildiginiń uıymdastyrýymen ótken sharaǵa respýblıkalyq jáne Almaty qalalyq etnomádenı birlestikterdiń shyǵarmashylyq ujymdary qatysyp, óz ónerlerin ortaǵa saldy.
Festıvaldi ótkizýdiń baǵyt-baǵdarynan habardar etken «Qoǵamdyq kelisim» RMM sarapshysy, «Dostyq Úıi» medıasııa kabınetiniń jetekshisi Nursáýle Altekova osyndaı mazmundaǵy sharalar óskeleń urpaqtyń boıynda rýhanı qundylyqtardy qalyptastyrýǵa, ulttyq ádet-ǵuryptardy nasıhattaýǵa, sondaı-aq etnomádenı keńistikti damytýǵa yqpal etetindigin atap ótti.
Qazaqstanda turyp jatqan ulttar men ulys ókilderiniń mádenıeti men salt-dástúrlerin nasıhattaýǵa baǵyttalǵan sharanyń ashylý saltanatynda D.Qonaev atyndaǵy Eýrazııalyq zań akademııasynyń rektory О́miráli Qopabaev, «Orys, slavıan jáne kazak uıymdary qaýymdastyǵy» ZTB Almaty fılıalynyń basshysy Vladımır Shıhıtov, T.Júrgenov atyndaǵy О́ner akademııasynyń professory Meńdiǵanym Shaımerdenova, QHA adageri Klara Han, boýlıngtan úsh dúrkin Qazaqstan chempıony, Abý Dabıde golftan ótken álem chempıonatynyń júldegeri, Azııa jáne Eýropa oıyndarynyń kúmis júldegeri Elına Alıeva, t.b. sóz sóılep, beıbit eldiń berekesi – tatýlyq men yntymaqty tirlikte jatqandyǵyna toqtaldy. Búginde halyqtar dostyǵy men tatýlyǵyn arttyrýda Elbasynyń eńbegi zor ekendigin atap ótken assambleıa músheleri qalyń kópshilikti aldaǵy saıası naýqan - saılaýǵa bir kisideı atsalysýǵa shaqyrdy.
Ulttyq salt-dástúr taqyrybyn arqaý etken festıval barysynda elimizde turyp jatqan ult ókilderiniń teatrlandyrylǵan qoıylymdary, ulttyq kıimdegi sazdy baǵdarlamalary saltanatty keshtiń mazmunyn baıyta túsip, besik jyry shyrqaldy. Ár ulttyń halyq ánderimen qatar áýelegen tanymal kompozıtorlardyń ánderi keshtiń sánin kirgizdi.
