Jastardy kásipkerlikke baýlyp, tyń ıdeıalardy izdegen saıysta «IT», «Ǵylym jáne tehnologııa», «Áleýmettik jobalar», «Týrızm», «Agrobıznes» baǵyttary boıynsha irikteý kezeńinen ótken 25-joba óz jobalaryn qorǵaǵan edi.
Kásipkerlerden quralǵan qazylar alqasynyń aldynda qatysýshylar óz jobalaryn 7 mınýt ishinde tanystyryp shyqty. Konkýrstyq komıssııa sheshimimen «IT» baǵytyndaǵy úzdik joba dep Rodıon Ignatov pen Aıjuldyz Nadırhanovanyń «UARStuding» startapy tanylsa, «Ǵylym men tehnologııa» baǵytynda Nurbergen Naýryzbaevtyń «Plastık qaldyqtaryn óńdeý arqyly munaı men janarmaı kózin alý» bıznes-jobasy 350 myń teńgege ıe boldy. «Áleýmettik jobalar» baǵytynyń úzdigi Súıerqul Nurmuhammed, Mýhamedzıanov Madııar, Jumaǵalın Bekzattyń «Z Generation – The New Way To The Future» boldy. «Týrızm» baǵytyndaǵy úzdik joba Dana Esbergenovanyń «Gorodskoe vodno-bolotnoe ýgode kak model ekosıstemy, ýstoıchıvoı k antropogennomý vozdeıstvııý (na prımere ozera Karakol)» ıdeıasy, «Agrobızneste» shash pen tyrnaqtan tyńaıtqysh jasaýdy usynǵan Baıdaýlet Azamat jeńdi.
- «Caspian Startup-2019» saıysynyń ótkizilý formaty men ıdeıasy qatty unady. Men jobamdy kásipkerler aldynda tanystyryp, bastamama sendirýdiń qupııalarymen, bıznes-jospar jasaýdy úırendim. Jeńisten alǵan qarajatymdy depozıtke salyp, bolashaqta joǵary oqý ornyna túskende qajetime jaratýdy josparlap otyrmyn, deıdi «Agrobıznes» nomınasııasynyń jeńimpazy Azamat Baıdaýlet.
Startap jobalar baıqaýynyń jeńimpazdaryna qarjylaı syılyqty «MKS Logistics» JShS, «Mediana» IT-kompanııasy, «EXPO&WOMEN», «Evrovoıaj» týr agenttigi, «TETIS» JShS beredi. Al Mańǵystaý oblystyq bilim basqarmasy, «Mangystau» telearnasy, «Atameken» kásipkerler palatasynyń, Mańǵystaý oblystyq fılıaly baıqaý seriktesteri.
-Baıqaý úsh kezeńnen turdy. Qatysýshy eń aldymen jobanyń mańyzdylyǵy, suranysy, tıimdiligi týraly prezentasııa daıyndap, saıtymyzǵa tirkeldi. Sonan soń baıqaýdyń qazylar alqasy kelgen jobalardyń ishinen eń úzdik 25 jobany tańdap, aqtyq kezeńge joldady. Irikteýden ótken qatysýshylar kelesi kezeńde bıznes-jobalaryn kásipkerler men qazylar alqasynyń aldynda qorǵady, deıdi zııatkerlik mekteptiń baspasóz qyzmetinen Yrysgúl Mátjanqyzy.
Bıyl ekinshi ret uıymdastyrylǵan bıznes-ıdeıalar saıysyna 195 jobadan ótinish kelip tústi, onyń 172-i jarysqa qatysty. Qatysýshylar «Áleýmettik jobalar» nomınasııasynda belsendilik kórsetti. 54 jobanyń ishinen bes joba ǵana iriktelip alyndy. Al «Agrobıznes» nomınasııasyna 42, «Týrızmge» - 35, «Ǵylym jáne tehnologııaǵa» 42 ótinish keldi. Al «IT» nomınasııasyna 20 joba qatysty.
Sonymen qatar, jarys qatysýshylarynyń kásipkerlikke yntasyn arttyrý maqsatynda «Atameken» kásipkerler palatasynyń kásibı bıznes treneri Raıhan Bekbergen men Yessenov ýnıversıteti janyndaǵy Kaspıı kásipkerlik ortalyǵynyń jetekshisi Gúlzıra Qosmaǵanbetova arnaıy sheberlik saǵatyn ótkizildi.
