Sáýirdiń 10-29 aralyǵynda jumys atqarǵan ekspedısııa músheleri –ornıtolog Sergeı Shmygalev, kómekshi-júrgizýshi Vladımır Isaenko men ekinshi júrgizýshi Igor Svastın zertteý saparynyń nátıjelerimen bólisti.
Ekspedısııa baǵyty búrkitter mekendeıtin Almaty oblysynyń aýmaǵyndaǵy Arqarly men Malaısary, Úlken jáne Kishi Buǵyty, Sógeti taýlary, Toraıǵyr men Sharynnyń joǵarǵy bóligin qamtydy.
Ekspedısııanyń esepteýinshe, zerttelgen aýmaqta búgingi tańda 36 búrkit mekendep jatyr. Mamandar 14 tastúlek pen muzbalaqty jáne 11 jupty tirkegen.
«Birinshi kezeńde Jońǵar Alataý taý silemderi zertteldi. Saparymyz bastalǵannan keıingi birneshe kún ishinde alǵashqy eki búrkit jubyn anyqtadyq. Ekinshi kezeńde Ile Alataý aýmaǵyn jáne alty jyl boıy búrkitter erkindikke jiberilgen Almaty oblysynyń jerlerin qarap shyqtyq. Tekserilgen telimderde biz tastúlekterdi de, uıa salatyn búrkitterdi kezdestirdik», deıdi top jetekshisi Sergeı Shmygalev.
Ekspedısııa Qazaqstanda 2012 jyly qolǵa alynǵan «Úlesińdi qos. Tabıǵatty aman saqtap qal» atty «Efes Qazaqstan» kompanııasy jobasynyń aralyq qorytyndysyn shyǵaryp otyr. Osy kezeń ishinde «Suńqar» tálimbaǵynda 25 búrkit balapany ósirilip, tabıǵat aıasyna jiberildi.
Qazaqstan aýmaǵynda mekendeıtin búrkitterdiń sany sońǵy ret 7 jyl buryn eseptelgen eken. 2012 jylǵy esepteý nátıjesi men ornıtologtardyń baǵalaýynsha búrkitterdiń popýlıasııasy azaıǵan, Almaty oblysynyń Úlken jáne Kishi Buǵyty aımaǵynda bar-joǵy 4-5 jup qana qalǵan bolatyn.
«Kóp jyl boıǵy bizdiń eńbegimiz osyndaı tamasha nátıjelerdi ákelip otyrǵanyna asa qýanyshtymyz. 2012 jylmen salystyrǵanda qazir uıa salatyn búrkit juptarynyń birneshe esege óskeni baıqalyp otyr. Qazaqstan memlekettik baıraǵynda beınelengen ulttyq nyshandy saqtap qalý – bizdiń kompanııanyń korporatıvtik áleýmettik jaýapkershilik salasyndaǵy basymdyq beretin mindetteriniń biri», deıdi «Efes Qazaqstan» ShS AQ korporatıvtik qatynastar departamentiniń dırektory Shyńǵys Qaskeev.
Búrkitterdi qorǵaýǵa arnalǵan baǵdarlama ary qaraı da júzege asyryla bermek.
