Osy ýaqytqa deıin «Nurly jer» baǵdarlamasy arqyly myńdaǵan jambyldyqtar páterge qol jetkizdi. Endi bul bastamany aýdan ákimderi de júzege asyryp, jergilikti halyqty baspanamen qamtýda. 1 mamyr – Qazaqstan halyqtarynyń birligi merekesine oraı «Nurly jer» baǵdarlamasy aıasynda Talas aýdany, Qarataý qalasynda jańǵyrtýdan ótken 60 páterlik kópqabatty turǵyn úı paıdalanýǵa berildi. Talas aýdanynyń ákimi Dosmahanbet Álıev qarataýlyqtarǵa páter kiltin tabystady.
Qaladaǵy №5 shaǵyn aýdanynda ornalasqan №55 úıge qaıta jańǵyrtý jumystaryn tarazdyq merdiger «Temir-Baılyq» jaýapkershiligi shekteýli seriktestigi júrgizgen. Joba quny 228 mıllıon 450 myń teńgeni quraǵan. Nysan ótken jyly 6 maýsym kúni paıdalanýǵa qabyldanyp, ınfraqurylymdyq jumystary júrgizilgen. Mereke qarsańynda paıdalanýǵa berilgen bul arendalyq turǵyn úıde eki bólmeli 10, úsh bólmeli 30, tórt bólmeli 20 páter bar. Atalǵan turǵyn úıge qonys aýdaratyn adamdardyń tizimi aýdandyq turǵyn úı komıssııasy tarapynan jasaqtalǵan eken. Talas aýdany ákimdiginiń málimetinshe, paıdalanýǵa berilgen kópqabatty turǵyn úıden páter alǵan 60 otbasynyń 40-y áleýmettik az qamtylǵan otbasylar tobyna jatady. Onyń ishinde kópbalaly 17, tolyq emes 15, múgedek bala asyraýshy 2 otbasy bar. Sondaı-aq, 1 múgedek jáne 5 oralman otbasy da páter kiltin ıelengen. Qalǵan 20 páter memlekettik jáne bıýdjettik qyzmetkerler men qyzmettik páter ıelenýshilerge berildi.
Aıta keteıik, Talas aýdany boıynsha 2018-2019 jyldary barlyǵy 440 páterdi quraıtyn 6 kópqabatty turǵyn úıdi qaıta jańǵyrtý josparlansa, búginde onyń 290 páter paıdalanýǵa berilgen. Al, aǵymdaǵy jyly taǵy da 2 turǵyn úı, ıaǵnı 150 páter paıdalanýǵa beriletin bolady. Bul óz kezeginde aýdan boıynsha turǵyn úı kezeginde turǵan 143 áleýmettik az qamtylǵan otbasyny baspanamen qamtýǵa baǵyttalady.
Jambyl oblysy
