Festıvalge qatysqan ár ult óziniń tanym-tarıhyn, qasıet qalybyn tanytatyn ulttyq qundylyqtaryn pash etýge tyrysyp baqty. Basty ustanymymyz birlik dep urandatqan QHA qarasty etnomádenı birlestikterdiń ókilderi jınalǵandar nazaryna ózderiniń baı dastarhandaryn usyndy. Uıymdastyrýshylar sharanyń negizgi maqsaty halyqtar arasyndaǵy yntymaqtastyq mádenıetin qalyptastyrý. Sol arqyly kópshilikti Qazaqstanda turatyn etnostardyń aspazdyq erekshelikterimen tanystyrý jáne túrli etnostar arasyndaǵy mádenıetaralyq túsinistikti nyǵaıtý ekenin aıtady. Qatysýshylar ár etnostyń qonaq kútý salty, taǵamdarynyń densaýlyqqa paıdasy, ázirlený ádisteri týraly áńgimelep, án men bıden shashý shashty.
Festıvalge qatysqandardyń ishinde kásibı aspazdarmen qatar muǵalim, dáriger syndy basqa salanyń qazanynda qaınaǵan áýesqoı aspazdar da boldy. «Qolyń tátti bolsa, daıyndaǵan astyń da dámi til úıiredi. Eger as jaqsy nıetpen, mahabbatpen, kóterińki kóńil-kúımen ázirlense sózsiz dámdi bolady, deıdi taǵam kórmesine qatysýshylardyń biri Qazyna Beketova.
m «Birlik degen uǵymnyń sóz kúıinde qalyp qoımaı, ispen dáleldengeni qandaı jaqsy. Úzbeı ótkizilip kele jatqan búgingi dástúrli taǵamdar kórmesi sonyń aıǵaǵy» degen qoǵam qaıratkeri Asly Osman, qıyn taǵdyrdyń qıly kezeńinde pana surap kelgen barsha jurtty baýyryna basqan qazaq eliniń qushaǵy, keń dastarhany qashanda jıylmaı kele jatqanyn aıtady.
