Almaty – azattyqtyń besigine balanǵan, eldigimizdiń irgesi qalanǵan qasterli qala ekenin aıtqan Memleket basshysy barsha Qazaqstan halqyn yntymaq merekesimen quttyqtady.
– Qurmetti áleýmet, qadirli qaýym, ardaqty almatylyqtar! Búgin erekshe kún. Tatýlyq merekesi. Elimiz bul merekeni erekshe jaqsy kóredi. Sondyqtan barshańyzdy shyn júrekten quttyqtaımyn. Ult pen ulystyń yntymaǵyn dáripteıtin osynaý merekeniń qadir-qasıetin bárimiz jaqsy bilemiz. Eki kún buryn ǵana ótken Qazaqstan halqy Assambleıasynyń basqosýynda sóılegen sózinde Elbasymyz el ishindegi myzǵymas tatýlyqtyń mańyzdylyǵyn atap ótti. Tarıhtyń san qıly syn saǵattarynda qazaq jerin panalap kelgen kóptegen ult ókilderi bir úıdiń balasyndaı týys, baýyr boldy. Zamannyń taýqymetine qaramastan, bizdiń halqymyz solardyń bárin baýyryna basyp, barymen bólisti. Egemendik alǵan jyldary kópetnosty, kópkonfessııaly elimizdiń keleshegi týraly túrli teris boljamdar aıtyldy. Alaıda, Elbasymyzdyń arqasynda Qazaqstan búginde túrli etnos ókilderiniń kıeli shańyraǵyna aınaldy.
«Birińdi qazaq, biriń dos, Kórmeseń istiń bári bos» dep uly Abaı aıtqandaı, biz elimizdiń jemisti ári jeńisti kúnderine yntymaǵymyz arqyly jettik. Qymbatty almatylyqtar, tabıǵaty tańǵajaıyp arý Almaty – biregeı, balamasy joq shahar. Onyń jylnamasy – búkil Otanymyzdyń jarqyn aınasy. Jas memleketimizdiń jetistikterin dúnıe júzine alǵash tanytqan da osy Almaty. Alataý baýraıyndaǵy ásem qala búginde qazaq zııalylarynyń qutty mekeni bolyp otyr. Almaty – ǵylymnyń ordasy, ónerdiń besigi, shyǵarmashylyqtyń shańyraǵy, – dedi Qasym-Jomart Toqaev.
Merekelik sharada elimizdi mekendegen túrli ult ókilderiniń tanym-tarıhynan syr shertetin kórme uıymdastyrylyp, otandyq ónerpazdar án men kúıden shashý shashty. «Jigitter» kvarteti, «Saltanat» bı ansambli, «Asylym» bı toby, Ardaq Balajanova, Merýert Túsipbaeva, Álı Oqapov, Dınara Sultan, Kámshat Joldybaeva syndy ónerpazdar merekeniń ajaryn arttyrdy.
ALMATY
