Osyndaı tarıhı jádigerdiń biri – Jambyl oblysy Qordaı aýdandyq K.Ázirbaev atyndaǵy ádebı-memorıaldyq mýzeıde turǵan Kenen atanyń dombyrasy. – Men ákemniń jeti dombyrasyn kórdim, – deıdi jyrshy babamyzdyń balasy Baqytjan aǵa. – Sonyń ishinde «Keneniń ker dombyrasy» degen boldy. Ony ataqty qyrǵyzdyń tókpe aqyny syılaǵan eken. Odan keıin ózim kórgem joq, 1910 jyldar shamasynda Erkebaı bolys jasatyp bergen eren dombyrasy bolǵany týraly estigenim bar...
Al ana mýzeıdegi dombyrany Kenekeńniń 75 jyldyq toıynda akademık Ahmet Jubanov ózi jasatyp ákelip syılaǵan eken. Mundaǵy ózderińiz kórip otyrǵan sýret sol toıdyń ústinde fotoapparat taspasyna túsip, keıin tarıhqa aınalǵan bir beıne.
Bir qyzyǵy, Kenen atamyzdyń buǵan deıin eshqandaı mereıtoıy atap ótilmepti. Alǵash ret 1954 jyly úkimetimiz aqynnyń 70 jyldyq toıyn atap ótýdi josparlaǵanymen bul shara Keńes eliniń kósemi Stalınniń qaıǵyly qazasymen qabattasyp qalyp, toqtatylǵan kórinedi.
Kenenniń mereıtoıyna qatysyp, óziniń syı-sııapatyn jasaǵan Ahmet Jubanov óziniń uzaq jyldar boıy júrgizgen ǵylymı-zertteý jumysynyń nátıjesi «Zamana bulbuldary» atty kitabynyń 2001 jyly qaıtalap basylǵan nusqasynda: «1959 jyly Kenenniń 75 jasqa tolý saltanaty ótti. «Toı dese qý bas domalaıdy» degendeı, Almatydan, Tarazdan, basqa qalalardan, kórshiles qyrǵyzdan kóptegen adamdar jınaldy. Ol kúni Kenen burynǵysynan da jasaryp, únemi jańa bir áýenderge qurylǵan shyǵarmalar aıtýmen boldy. Sonymen qatar jańalyqty kórkem izsiz qaldyrmaıtyn aqyn, óziniń osy bir kezeńine, asýyna arnap «Jetpis bes» degen jańa ánin men syılaǵan dombyramen aıtyp berdi» dep eske alypty.
