Endi áskerı qyzmetkerler men arnaıy memlekettik organ qyzmetkerlerine Turǵyn úı qurylys jınaq banki («Báıterek» holdınginiń enshiles uıymy) arqyly baspana satyp alý úshin konkýrsqa qatysyp, onyń qortyndysyn kútýdiń qajeti joq. Turǵyn úı qurylys jınaq banki «áskerı ónimniń» sharttaryn jeńildetti.
Sondaı-aq, turǵyn úıdi tańdaý barysynda eshqandaı shekteýler qoıylmaıdy. Nesıeni jańa úıden daıyn páter satyp alýǵa, úlestik qurylysqa qatysýǵa nemese qaıtalama naryqtan baspana satyp alý úshin jumsaýǵa bolady. Turǵyn úıdi satyp alý kezinde zaem somasyna páterdiń ishki jóndeý jumystaryn júrgizýge jumsalatyn shyǵyndardy qosýǵa bolady.
Jańa turǵyn úı baǵdarlamasyna jeke páteri bar, biraq óz mekemesinde turǵyn úıge muqtaj tulǵa retinde tanylǵan áskerı qyzmetkerler de qatysa alady.
– Jańartylǵan sharttarǵa saı, 16 mıllıon teńgeni quraıtyn alǵashqy nesıe taldyqorǵandyq áskerı qyzmetkerge berildi. Ata-anasymen turǵan ol endi óz otbasymen birge jańa úıdegi 4 bólmeli keń páterge kóshetin bolady. Bizdiń boljamǵa sáıkes, osy jyly qonys toıyn jalpy 4 000 áskerı qyzmetker atap ótpek. Olarǵa nesıe berý maqsatynda bank tarapynan 59 mlrd teńge bólindi, - deıdi Turǵyn úı qurylys jınaq bankiniń Basqarma tóraıymy Lázzat Ibragımova.
«Áskerı ónim» boıynsha nesıe somasy elimizdiń aımaqtary men otbasynyń quramyna táýeldi turǵyn úı tólemderiniń mólsheri boıynsha eseptelinedi. Iаǵnı, otbasy quramy neǵurlym úlken bolsa, turǵyn úı de soǵurlym úlken bolady. Sondyqtan, áli de óz otbasyn qurmaǵan áskerı qyzmetkerler men balaly bolýdy josparlaǵan otbasylardyń páter satyp alýǵa asyqpaǵandary jón. Dál qazirgi kezde olar úshin Turǵyn úı qurylys jınaq bankindegi shotta turǵyn úı tólemderin jınap, aldaǵy ýaqytta jyldyq 3,5-5% mólsherlememen zaem alý asa tıimdirek.
Esterińizge sala ketsek, ótken jyly áskerı qyzmetkerlerdiń turǵyn úı tólemderin paıdalaný mehanızmi ózgerdi. Iаǵnı, olar endi osy tólemderdi tek jalǵa alǵan bireýdiń páterine tólemeı, óziniń jeke baspanasyn satyp alýǵa jumsaı alady. Áskerı qyzmetkerlerge qoldaý kórsetý maqsatynda Turǵyn úı qurylys jınaq banki qarajat bólip, olar úshin 2025 jylǵa deıingi jeke turǵyn úı baǵdarlamasyn ázirlep shyǵardy. О́tken jyldyń qyrkúıek aıynan bastap «áskerı ónim» baǵdarlamasyna 2 500 adam qatysty.Taǵy 70 myń áskerı Turǵyn úı qurylys jınaq bankinde shot ashyp, ózderiniń turǵyn úı tólemderi esebinen qarajat jınaqtaýda.
Turǵyn úı qurylys jınaq banki – arnaıy salymdary erekshe mártebe men qol suǵylmaýshylyq kepiline ıe jalǵyz bank. Áskerı qyzmetkerlerdiń jınaqtary bıýdjet esebine alynbaıdy, atalǵan shot ıesiniń basqa mindettemeleri boıynsha tyıym salynbaıdy ári ekinshi deńgeıli bank qandaı da bir berilgen nesıeler boıynsha ýaqytyly tólenbegen bereshekter úshin tólem talabyn qoıa almaıdy.
Al ótken jyly Askeri.baspana.kz portaly arqyly baǵdarlamaǵa qatysý úshin ótinish bergendermen baǵdarlamaǵa qatysýshylar pýlyna engizilgen áskerı qyzmetkerler ótinimdi burynǵy sharttar boıynsha, ıaǵnı, 2019 jyldyń 30 qyrkúıegine deıin berýlerine bolady.
