Qaıta túrlengen velosıped joly adam tanymastaı ózgergen. Onyń aýmaǵynda pamp-trek, dert-part, skeıt-part syndy arnaýly jolaqtar paıda bolǵan. Syıymdylyǵy 200 kórermenge arnalǵan sý jańa trıbýna men aınalmaly jaryq ornatylǵan. Kásibı sportshylardan bólek sportty janyna serik etken kez-kelgen azamat munda kelip boı sergitip, sportpen shuǵyldana alady. Kelem deýshilerdiń jas erekshelikterine de shekteý joq. Aldaǵy ýaqytta jańa velosıped jolynda jergilikti jáne halyqaralyq deńgeılerde jappaı sporttyq jáne mádenı sharalar ótkizý josparlanyp otyr.
«Qor qashanda sporttyń jáne sport ınfraqurylymynyń damýyna erekshe kóńil bóledi. Osyǵan baılanysty velo joldardy qalpyna keltirý jumystaryn qarjylandyrý týraly sheshim qabyldandy. Bul jas azamattardyń jáne jas urpaqtyń súıikti orny bolatynyna senimdimin, munda bolashaq chempıondardyń alǵashqy qadamdary jasalady. Deni saý urpaq –tuǵyrly ulttyń bolashaǵy», dedi Ahmetjan Esimov.
Sondaı-aq A. Esimov Qordyń qaıyrymdylyq saıasatyn qaıta qaraý týraly baıandady. Atap aıtqanda, Qor mereıtoılyq is-sharalardy jáne qoǵamdyq birlestikterdiń kommýnaldyq máselelerin sheshýden bas tartyp otyr. Áleýmettik mańyzy bar jobalardy damytý, balalardy ońaltý, bilim berýdi damytý jáne medısınalyq kómekti keńeıtý budan bylaı qaıyrymdylyq saıasattyń basty baǵytyna aınalmaq.
– Qalamyzda buqaralyq sportpen aınalysam degen janǵa barlyq jaǵdaı jasalǵan. Búgingi velosıped jolynyń iske qosylýy da bizder úshin úlken qýanysh. Ásirese biz sııaqty zeınet jasyndaǵy azamattar men jastar úshin taptyrmas múmkindik, – dedi qala turǵyny Serik Baıseńgirov.
Aıta ketken jón, «Samruk-Kazyna Trust» áleýmettik jobalardy damytý qory «Samuryq-Qazynaǵa» kiretin barlyq kompanııalardyń atynan jalpy quny 4,8 mlrd teńge bolatyn, áleýmettik mańyzdy máselelerdi sheshýge baǵyttalǵan 15 jobany júzege asyrǵan. Sal aýrýyna shaldyqqan 1170 balaǵa tegin ońaltý kýrstary uıymdastyrylyp, mektep jasyndaǵy 9000-nan astam jasóspirim Qordyń qoldaýymen oqý jáne sport úıirmelerine tegin qatysyp júr.
