Belarýs hokkeıshilerine qarsy ótken oıynnyń birinshi kezeńi jerlesterimiz úshin sátti bastaldy. Matchtyń toǵyzynshy mınýtynda Nıkıta Mıhaılıs esepti ashsa, 16-mınýtta Talǵat Jaılaýov tablodaǵy kórsetkishti 2:0-ge jetkizdi. Alaıda ekinshi kezeńniń 27-mınýtynda Belarýs quramasy qarymta shaıba soǵyp úlgerdi. Shaıba avtory – Artem Demkov. Úshinshi kezeńniń alǵashqy bes mınýty qonaq komandanyń basymdyǵymen ótti. Kezdesýdiń 45-mınýtynda Belarýs hokkeıshileri degenderine jetip, Nıkıta Feoktıstov taraz basyn teńestirip ketti.
Oıynnyń negizgi kezeńi teń nátıjemen aıaqtalǵan soń, jeńimpaz quramanyń esimi overtaımda anyqtaldy. Qosymsha kezeńniń úshinshi mınýtynda Arkadıı Shestakov gol soǵyp, Qazaqstan quramasyna jeńis syılady. Qorytyndy esep – 3:2. Tórtinshi týrdan keıin 11 upaı jınaǵan Qazaqstan quramasynyń hokkeıshileri birinshi orynmen hokkeıden álem chempıonatynyń elıtaly dıvızıonyna qaıta oraldy.
