Koreıanyń saıası elıtasy ınnovasııalardyń mańyzdylyǵyn, ǵylymnyń aralasýyn qajet etetin, ásirese, jastardyń startaptyq kompanııalaryn qurýdyń kókeıkestiligin anyq túsinedi. Al mundaı halyqaralyq yntymaqtastyq eki jaqqa da tıimdi bolǵan jaǵdaıda tabystylyǵy arta túspek. Sondyqtan da Ońtústik Koreıa prezıdenti jumys saparynyń asa tyǵyzdyǵyna qaramastan ál-Farabı atyndaǵy Qazaq Ulttyq ýnıversıtetiniń organıkalyq zattar, tabıǵı qosylystar jáne polımerler hımııasy men tehnologııasy kafedrasynyń meńgerýshisi, professory Grıgorıı Alekseevıch Mýnmen kezdesýi mańyzdy oqıǵalar qataryna qosyldy.
Búgingi tańda eki el arasyndaǵy yntymaqtastyq shyn máninde damyp, nyǵaıa tústi desek, ol aýqymdy ınvestısııalyq jobalardy, mádenıet pen ǵylym salasyndaǵy tyǵyz ózara baılanysty da qamtıdy.
Prezıdent Mýn Chje Inniń «Kahak» Koreı ǵylymı-tehnıkalyq qoǵamynyń prezıdenti, professor Grıgorıı Mýnmen kezdesýi óte mańyzdy da jemisti boldy. Qysqa kezdesý barysynda Grıgorıı Alekseevıch Mýn Ońtústik Koreıa Respýblıkasynyń prezıdenti Mýn Chje Inmen qazirgi ýaqytta ál-Farabı atyndaǵy QazUÝ ǵalymdary jumys isteıtin irgeli ıdeıalarmen bólisken bolatyn.
Bul kúnderi ál-Farabı atyndaǵy QazUÝ Ońtústik Koreıanyń 47 birdeı ýnıversıtetimen jáne túrli uıymdarymen tikeleı áriptestik qarym-qatynas ornatyp, 52-ge tarta eki jaqty mámilelerge qol jetkizip otyr.
Máselen, ál-Farabı atyndaǵy QazUÝ rektory Ǵalym Mutanovtyń 2017 jyly Koreıa Respýblıkasy Prezıdentiniń eki el ǵalymdarynyń halyqaralyq yntymaqtastyǵyna qosqan kórnekti úlesi úshin "Qurmet" belgisimen marapattalýy da kezdeısoqtyq emes.
Al joǵarydaǵy kelisimsharttardyń aýqymy keń: stýdentter men oqytýshylar almasý, birikken ǵylymı jobalardy júzege asyrý, professorlardy dáris berýge shaqyrtý, PhD-doktoranttarynyń birikken jetekshiligi. Sondaı-aq ınnovasııalyq tehnologııalar almasý men ǵylymı-zertteý isteriniń nátıjesin kommersııalaý maqsatynda, QazUÝ ortalyǵy Koreıanyń jetekshi ýnıversıtetteriniń ǵalymdary men mamandarynyń belsendi aralasýy men qoldaýyna súıene otyryp, qazirdiń ózinde 2 iri ınvestısııalyq joba júzege asty. Bul «Medısınalyq-bıologııalyq klaster» jáne «Injınırıngtiń ınnovasııalyq klasteri men ǵylymdy qajet etetin tehnologııalar» jobalary.
Qaı kezde de ǵylymdaǵy jańalyqtardyń moıyndalyp, qoldanysqa enýi óte úlken kedergilerge tap kelip jatady. Al qazaqstandyq ǵalymdar úshin memlekettik basshylar tarapynan kórsetilgen qoldaýdyń kómegi orasan zor.
Qazirgi tańda ál-Farabı atyndaǵy Ulttyq ýnıversıtettiń ǵalymdary kezdesý barysynda ortaǵa salynǵan ǵylymı jobalarmen nátıjeli jumys istep otyr.
ALMATY
