Araǵa bir jyl salyp, Elbasy memlekettiń áskerı qaýipsizdigin qamtamasyz etetin «Qazaqstan Respýblıkasynyń qorǵanysy jáne Qarýly Kúshteri týraly» Zańǵa qol qoıdy. Sóıtip Qarýly Kúshterdiń quramy anyqtaldy. Sol tusta oǵan áskerı basqarý organdary, Qurlyq áskerleri, Áskerı-áýe kúshteri, Áýe shabýylyna qarsy qorǵanys áskerleri, Áskerı-teńiz kúshteri, Tyl, Azamattyq qorǵanys basqarmasy men bólimderi kirdi. Sondaı-aq Qarýly Kúshter yqtımal soǵys jaǵdaıynda UQK Shekara áskerlerin, IIM Ishki áskerlerin, Respýblıkalyq ulandy jáne Azamattyq qorǵanystyń basqarý organdary men bólimderin qamtıdy. Buǵan qosa, Memleket basshysy Joǵarǵy Keńestiń qurylymynda Ulttyq qaýipsizdik jáne qorǵanys komıtetin qurý týraly usynysty maquldady.
Elbasynyń strategııalyq sheshimderi elimizdiń jańa Qarýly Kúshteriniń qurylýyna negiz boldy. Onyń qatarynda ıadrolyq qarýdan bas tartý týraly sheshimin bólek atap ótken jón. Nursultan Nazarbaevtyń Jarlyǵymen Semeı ıadrolyq polıgony jabyldy. Qazaqstan álemdegi tórtinshi ıadrolyq áleýetke jetkizetin Keńestiń áskerı murasynan bas tartty. Ol jerdiń kez kelgen núktesine jetýge qaýqarly 1200 ıadrolyq oqtumsyǵy bar 110-nan asa ballıstıkalyq zymyran edi. Osylaısha Tuńǵysh Prezıdent eliniń tynyshtyǵy men gúldenýin saıası ambısııalardan joǵary qoıdy. Bul qazaqstandyq armııa úshin de týra jol boldy, óıtkeni ıadrolyq kúshke arqa súıemeı, jańadan áskerı áleýetti qalyptastyrýǵa kúsh saldy.
Osydan týra 20 jyl buryn, 1999 jyly 7 mamyrda Qorǵanys mınıstrligi men Qazaqstan Qarýly Kúshteri Bas shtaby elordaǵa qonys aýdardy. Jańa ǵasyrdyń basynda 2000 jylǵy aqpanda ekinshi Áskerı doktrına bekitilip, Qarýly Kúshterdi qurý jáne reformalaýdyń basym baǵyttar naqtylandy. Sol jyly Tuńǵysh Prezıdent Qazaqstan armııasynyń áskerı áleýetin jaqsartý úshin ózgerister engizip, Qarýly Kúshter qaıtadan Jalpy maqsattaǵy kúshter jáne Áýe qorǵanysy kúshteri bolyp eki túrli qurylymǵa bólindi. Jalpy maqsattaǵy kúshterge Zymyran áskerleri men artıllerııa jáne Áýe shabýylyna qarsy qorǵanys áskerleri kirdi. Bir jyldan soń Qorǵanys mınıstrligi men Bas shtabtyń fýnksııalary bólindi.
Al 2003 jyldan bastap Qarýly Kúshter úsh túrli qurylymnan – Qurlyq áskerleri, Áýe qorǵanysy kúshteri jáne Áskerı-teńiz kúshterinen quraldy. Mobıldi kúshter negizinde áskerdiń jańa túri – Aeroutqyr áskerleri jasaqtaldy. Zymyran áskerleri men artıllerııa jeke ásker retinde quryldy. Sondaı-aq Shtab bastyqtarynyń komıteti qurylyp, áskerı okrýgter «Astana», «Shyǵys», «Batys» jáne «Ońtústik» óńirlik qolbasshylyqtary bolyp qaıta quryldy.
Memleket basshysy yqtımal qaýip-qaterlerge qarsy jedel áreket etetin HHI ǵasyrdyń armııasyn qurý týraly talap qoıdy. Sondyqtan Qarýly Kúshterdi odan ári jetildirýdiń basym baǵyty – áskerdi kásibılendirý bolyp belgilendi. Osy maqsatta 2007 jyly jańa Áskerı doktrına bekitildi. Onda aldyńǵy áskerı qujattyń negizgi tezısteri saqtalyp, sońǵy jeti jylda álemde bolǵan ózgerister, memleketter basshylarynyń áskerı qaýipsizdikti qamtamasyz etý salasyndaǵy basymdyqtarǵa kózqarasynyń ózgerýi eskerildi.
2017 jyly qyrkúıekte jarııalanǵan besinshi Áskerı doktrınada ishki tártipti qamtamasyz etýge basa nazar aýdaryldy. Sońǵy qujatta qazirgi zamanǵy saıası jaǵdaı qaperge alynyp, Qazaqstan óziniń aýmaqtyq tutastyǵy men egemendigin saqtaýǵa, terrorızmge, zańsyz qarýly qurylymdarǵa qarsy kúres júrgizýge daıyn ekendigi aıtylady.
Sonymen qatar áskerı saladaǵy ózgerister bilim berý bólimderine oń yqpalyn tıgizdi. Qazir Qazaqstannyń áskerı salasynda halyqaralyq standarttarǵa sáıkes keletin áskerı kadrlardy daıarlaýdyń ulttyq júıesi qalyptasty. Áskerı bilim berý úsh deńgeıli Bolon júıesi: bakalavrıat, magıstratýra, doktorantýra negizinde iske asady. Kadrlyq áskerı qyzmetkerler Ulttyq qorǵanys ýnıversıtetinde, Qurlyq áskerleriniń áskerı ınstıtýtynda, Radıoelektronıka jáne baılanys áskerı-ınjenerlik ınstıtýtynda, Áýe qorǵanysy kúshteriniń áskerı ınstıtýtynda daıarlanady. Buǵan qosa kásibı serjanttardy shyńdaıtyn Kadet korpýsy jáne respýblıkalyq áskerı mektepter jelisi jumys isteıdi.
Búgingi tańda Qazaqstan armııasynda belgilengen mindetti oryndaýǵa qaýqarly zamanaýı tehnıka úlgileri bar. Sońǵy jyldary qarý-jaraq qataryn shetten aldyrǵan BPM-97 jáne «Kobra» sekildi oq ótkizbeıtin mashınalar men qazaqstandyq óndiristen shyqqan ózdiginen júretin «Semser» artıllerııalyq qondyrǵysy, 120-mm «Aıbag» mınometteri sekildi jańa tehnıkalar tolyqtyrdy. Áýe qorǵanysy kúshterine MıG-31, Sý-27S kóp nysandy joıǵysh, Sý-24M, Sý-25, Sý-30SM bombalaýshylar, Eurocopter EC145, Mı-171Sh, Mı-24 tikushaqtary jáne taǵy basqa tehnıkalar qosyldy. Al Áskerı-teńiz kúshterinde «Qazaqstan», «Oral», «Saryarqa», «Mańǵystaý» zymyrandyq-artıllerııalyq kemeleri, «Jaıyq» gıdrografıkalyq kemesi bar.
Qarýly Kúshterdiń, ásker men áskerı qurylymdardyń qajettilikterine sáıkes otandyq kásiporyndardyń múmkindikteri men damý kókjıegin keńeıtý, olardyń ónimderin naryqta alǵa jyljytý maqsatynda byltyr Nur-Sultan qalasynda «Kadex» kórmesi ótti. Bul halyqaralyq qarý-jaraq jáne áskerı-tehnıkalyq múlikter kórmesinde álemniń 28 elinen kelgen 318 kásiporyn óz ónimderin usyndy.
Bıyl 15 sáýirden bastap osy kúnge deıin jalǵasqan «Aıbalta» strategııalyq komandalyq-shtabtyq oqý-jattyǵýyna jalpy 8 myńǵa jýyq áskerı qyzmetshi men 2 myńnan asa birlik qarý-jaraq pen áskerı tehnıka tartyldy. Bul oqý-jattyǵý jıynynyń barysymen Qazaqstan Prezıdenti – Qarýly Kúshterdiń Joǵarǵy Bas qolbasshysy Qasym-Jomart Toqaevtyń ózi baryp, tanysyp qaıtty. Onda shartty túrde túrli qaqtyǵystar oryn alyp, saıdyń saqpan tasyndaı sarbazdar jaýyngerlik is-qımyldaryn sheber kórsetip, áskerı daıyndyqtaryn pysyqtady. Memleket basshysy bul is-sharada Qazaqstannyń Qarýly kúshteriniń qýaty kórsetilgenin, kúshti ári mobıldi armııamyz eldiń senimdi qalqany ári tiregi ekenin aıtyp, qazaqstandyqtardy Otan qorǵaýshy kúni jáne Jeńis kúni merekelerimen quttyqtady.
