Rýhanııat • 09 Mamyr, 2019

Ájemniń áıbat mektebi

Jıennen týǵan jıenshar Danııar qazir soqtaldaı azamat. Oblys ortalyǵyndaǵy ýnıversıtettiń fılologııa fakýltetin bıyl bitiredi. Sabaǵyn jaqsy oqıdy. Túgel sózdiń túbin tolaıym aqtarmasa da, áıteýir bilmekke qumar. Áńgimeniń aýany Danııarǵa aýǵanda naǵashylaryna tartqan dep murtymyz kókke shanshylyp, kúpinip otyramyz. О́tken demalys kúni elge jol túsken. Danııar aldymen uly naǵashy ájesine sálem berdi. Ájesi qýanyp qaldy.

Baıqal BAIÁDIL

– Aınalaıyn Danııar, jaqsy keldiń! Qazan shegeleımiz. Saǵan kógentúp beremin, – dep qoıady.

Ýnıversıtettiń fılologııa fakýltetin bıyl támamdaıtyn Danııar qazan shegeleýdiń, kógentúptiń ne ekendigin bile qoımaıdy eken. Keıýana túsindirip jatyr.

– Et jaqyn týystardyń balalaryna qozy, laq, buzaý, qulyn ataıdy. Kógentúp berý burynnan kele jatqan dástúr. Bizdiń áýlette seniń de sybaǵań bar, – deıdi ájesi.

Sóz lámine saıatyn mazmun jalǵyz sybaǵa ǵana emes, janashyrlyq pen qaıyrymdylyq qaǵıdattary. Qazan shegeleýdi de shegelep túsindirdi. Sybaǵaly dámnen dám tatyrý eken. Meıman bosaǵadan attaǵan soń úı ıesi «kelgeniń jaqsy boldy ǵoı, qazan shegeleıtin adam taba almaı otyr edik» dese, qonaqjaılylyǵynyń belgisi.

Tústenip, sharýamyzdy bitirgen soń keıin qaıtqanbyz. Baqandaı ýnıversıtet bilimin boıyna sińirgen Danııar óziniń olqy tusyn endi ańdap, ájesiniń ádemi álemine áli de tánti bolyp keledi.

– Eń úlken bilim aýylda eken ǵoı, – deıdi ol, – osy jaz ádeıi kelip oqymasam.

Shynynda da, ájesiniń mektebi áıbat-aq qoı.