Saýda jáne ıntegrasııa mınıstrliginiń málimetinshe, naýryz aıynda áleýmettik mańyzy bar azyq-túlik taýarlary baǵasynyń ortasha ósý ındeksi 0,3%-dy qurady. Bul ótken jyldyń naýryz aıymen salystyrǵanda úsh ese tómen. Jalpy alǵanda, birinshi toqsanda baǵa ósimi 1,2% boldy, bul da 2025 jyldyń osy kezeńindegi deńgeıden úsh ese tómen. Osy dınamıka baǵa ósiminiń turaqty baıaýlaýyn kórsetedi.
Keńeste resmı statıstıka tutyný baǵalary ındeksin esepteýdiń halyqaralyq ádistemesine sáıkes qalyptastyrylatyny ári 537 taýar men qyzmet túrin qamtıtyny aıtyldy. Monıtorıng búkil el ishinde 12 myńnan astam saýda nysanynda júrgiziledi. Ishki saýda júıesinde shamamen 760 myń kásipkerlik sýbektisi jumys isteıdi, olardyń 300 myńnan astamy azyq-túlik ónimderin satýmen aınalysady.
Baǵanyń negizgi tómendeýi kókónis toby boıynsha tirkeldi. Qyryqqabat 1,9%-ǵa, qyzanaq 2,6%-ǵa, pııaz 10,9%-ǵa, qııar 22,6%-ǵa arzandady. Jyl basynan beri qııar baǵasy 31,1%-ǵa tómendedi. Saýda jáne ıntegrasııa birinshi vıse-mınıstri Aıjan Bıjanovanyń aıtýynsha, naryqty otandyq ónimmen qamtý kóbine jylyjaı sharýashylyǵy arqasynda jaqsy iske asty. Byltyrǵy qorytyndyda jylyjaılardyń jalpy alańy 1,33 myń gektardy qurap, 2024 jylmen salystyrǵanda 12,6 gektarǵa artty. Negizgi ósimdi fermerlik jylyjaılar bergen. 713,3 gektardan 799,4 gektarǵa deıin artqan.
«Qazir mınıstrlik ónerkásiptik jylyjaılarmen qyzanaq pen qııar baǵasyn turaqtandyrý jóninde memorandým jasasý aıasynda kelissózder júrgizip jatyr», dep habarlady Aıjan Bıjanova.
Oǵan qosymsha «QTJ» UK» AQ áleýmettik mańyzy bar azyq-túlik taýarlarynyń barlyq túrin, sondaı-aq áleýmettik nan óndirýge arnalǵan undy tasymaldaýda temirjol tarıfterine aıtarlyqtaı jeńildik berý máselesin pysyqtamaq. Kóktemde erte pisetin kókónisterge baǵanyń maýsymdyq ósýi eskerile otyryp, el naryǵyndaǵy ótken jylǵy ónim qory men basqa elderden jetkiziletin erte pisetin ónimderdiń jaǵdaıy da óz aldyna bólek qaraldy. Qazir turaqtandyrý qorlaryndaǵy ótken jylǵy ónim qorlary qarqyndy túrde satylyp jatyr. Aýyl sharýashylyǵy mınıstrliginiń derekterine sáıkes, olardyń qaldyǵy jalpy qor kóleminiń shamamen 24%-yn quraıdy.
Naýryz aıynyń basynan bastap eldiń ishki naryǵyna Qytaıdan jańa kókónistiń kúndelikti jetkizý uıymdastyryldy. Qazir 3 200 tonna kartop, 800 tonna sábiz, 14 tonna aq qyryqqabat jetkizildi. 31 naýryz kúni Saýda jáne ıntegrasııa mınıstrliginiń Saýda komıteti, óńirlik ÁKK, iri saýda jelileri, KTZ-Express, QazTrade ókilderinen quralǵan delegasııa erte pisetin ónimderdi satyp alý maqsatynda О́zbekstannyń ońtústik óńirlerine barady.
Baǵanyń tómendeýine Naýryz meıramy kezeńinde ótken merekelik jármeńkeler de qosymsha áser etti. El boıynsha mereke kúnderi 200-den astam taqyryptyq jármeńke ótkizildi. Jalpy, jyl basynan beri 1,5 myń jármeńke uıymdastyryldy. Nauryz sale aksııasyna 70%-ǵa deıingi jeńildik usynǵan 300 saýda sýbektisi qatysyp, 4 mıllıonnan astam adam qamtyldy.
