«9 mamyr kúni 21:10-da jol-patrýl polısııasy batalonynyń polıseıi, kishi serjant Azamat Bekturov pen Ulttyq gvardııa áskerı qyzmetshileri patrýl kezinde Kókshetaý qalasyndaǵy Táshenov - Abaı kósheleriniń qıylysynda adamdardyń jınalǵanyn jáne jerde jatqan adamdy baıqaıdy. Qala turǵyndarynyń aıtýynsha, er adamnyń epılepsııasy ustap qalǵan. Azamat jaǵdaıdy birden baǵalap, zardap shegýshige alǵashqy medısınalyq kómek kórsetedi. Osy kezde jedel járdem shaqyryldy», - dedi Aqmola oblystyq polısııa departamentiniń baspasóz qyzmetinen.
«Epılepsııa belgileri ár bes mınýt saıyn jalǵasqan jáne órshı túsken. Bir kezde er adam tynys almaı qaldy», - dedi Azamat.
Polıseı abdyrap qalmaı, alǵashqy kómek kórsetýdi jalǵastyra bergen jáne osynyń arqasynda naýqas jigit tiri qalǵan.
«Jedel járdem kelgenge deıin polısııa jasaǵy zardap shegýshiniń qasynda bolyp, keıin er adamdy mamandardyń qolyna tapsyrǵan», - dedi óńirdiń polısııa departamentiniń baspasóz qyzmetinen.
