17 kúnge josparlanǵan sapar Aral teńiziniń Qazaqstan aýmaǵy boıynsha 4000 shaqyrymdy qamtıdy. 2019 jyldyń 12 - 28 mamyr aralyǵynda saıahatshylar kelesi baǵyt boıynsha jol júredi : Nur-Sultan – Arqalyq - Torǵaı – Yrǵyz – Shalqar - Begimbet - Bozoı – Ońtústik núktesi – Chernyshev shyǵanaǵy - Qulandy - Tushybas – Shevchenko shyǵanaǵy- Shubartaraýyz túbegi - Aqespe – Býtakov shyǵanaǵy – Qotyrnaq túbegi – Aral - Qamystybas - Qaratereń - Kókaral bógeti– Qaratereń - Baıqońyr – Qyzylorda – Jezqazǵan - Qaraǵandy – Nur-Sultan.
Bul QazaqGeography-diń Aralǵa baǵyttalǵan úshinshi ekspedısııasy. 2016 jyldan bastap dástúrli túrde ótkiziletin sharaǵa shetel jáne qazaqstandyq ǵalymdar, geografııalyq qoǵamnyń belsendi músheleri men kásibı saıahatshylar qatysady. Aldyńǵy ekspedısııalar kezinde Soltústik Araldyń birneshe bólikterinde sýdyń gıdrobıologııalyq kúıi zerttelgen bolatyn. Osyǵan deıin Aral teńiziniń ortasha tuzdylyǵynyń tómendeý betalysy tirkelgen edi. Bul Soltústik Araldaǵy ekologııalyq jaǵdaıdyń jaqsaryp kele jatqany týraly aldyn ala qorytyndy shyǵarýǵa múmkindik berdi.
Aıta keter jaıt, 2018 jyly Nazarbaev Ýnıversıtetiniń gıdrobıolog ǵalymdarymen birge zertteý spektrine Ońtústik Aral kirip, teńizdiń О́zbekstan bóligi de zertteýge alyndy. Ǵylymı synamalardyń nátıjeleri boıynsha planktondyq toptanýlardyń bıoalýantúrliligi, sýdyń lastyǵy, qyshqyldyǵy, tuz, fosfor deńgeıi týraly derekter jınaldy, ol Soltústik jáne Ońtústik Aral ekojúıesiniń damýyndaǵy aldyn ala trendti anyqtaýǵa múmkindik berdi. Ǵylymı zertteý jumystarynan bólek, ekspedısııanyń maqsaty - Aral óńiri boıynsha týrıstik baǵyt kartasyn jasap, biregeı foto- jáne beınematerıaldar jınaýdy kózdeıdi.
