Bir jerimiz aýyra qalsa alyp ushyp kimge baramyz? Árıne, emhanaǵa, dárigerge júgiremiz. Solardan kómek suraımyz. Al jylyna bir keler aıshyqty merekede tirshilikke kúretamyr bolǵan izgishýaq jandardy merekesimen quttyqtaý ıgi dástúrge aınalsa quba-qup. Bıyl Almatyda osyndaı bastama qolǵa alyndy. Ataýly merekege oraı Almaty qalasy, №9 Qalalyq emhanasyna belgili ánshi Baqyt Shadaeva em alýǵa emes, aq halatty abzal jandardyń kúndelikti qyzmetimen tanysyp, olardy quttyqtaýǵa arnaıy keldi.
Estrada ánshisi bir kúnin meıirbıke qyzmetiniń qyr-syryn ashýǵa arnady. Aq halatty kıip alyp emdelýshilerdi qabyldap, meıirbıkeniń bir kúndik jumysymen tanysty. О́mirge sán, tirshilikkke nár berip, qoǵamǵa qaltqysyz qyzmetin usynyp, meıirimdilik pen jylylyqtyń sımvolyna aınalyp, ıgilikti mamandyq ıesi atanǵan meıirbıke isi qashanda syı-qurmetke laıyq ekenine kóz jetkizdi.
«Halyq densaýlyǵyn jaqsartý, medısınalyq qyzmet sapasyn arttyrý, halyqty qoljetimdi medısınamen qamtamasyz etý, medısınalyq alǵashqy járdemdi jetildirý, ana men bala densaýlyǵyn qorǵaý, aýrýdyń aldyn alý baǵytyndaǵy skrınıngtik tekserýler, turǵyndardy salaýatty ómir saltyna baýlý, basqa da qanshama sharalardyń júzege asyrylýyndaǵy meıirbıkelerdiń qyzmettik mindetteri, naýqasty qabyldaǵannan bastap, ony emdeý barysyndaǵy barlyq kúıbeń tirshiliktiń bel ortasynda júretin meıirbıkeler eńbegi shynynda ushan-teńiz. Meniń búgingi kúnnen jasaǵan qorytyndym osy» -deıdi ol.
Belgili ánshi meıirbıkelerdiń merekesine arnalǵan saltanatty jıynǵa qatysyp, №9 qalalyq emhanasynyń bas dárigeri Ásem Muratqyzymen birge qyzmetkerlerge alǵys hattar tabystady. Sóz sońynda, Halyqaralyq meıirbıkeler kúni merekesimen quttyqtap, «eren eńbekterińizdiń jemisin kórip, ult saýlyǵy jolynda aıanbaı eńbek etip, bıik belesterdi baǵyndyra berińizder» degen tilegin jetkizdi.
